Udhëheqësit e Kongresit ftohen për takim në Shtëpinë e Bardhë

Presidenti i Shteteve të Bashkuara, Donald Trump, i ka ftuar udhëheqësit e të dyja dhomave të Kongresit për një takim në Shtëpinë e Bardhë. Trump po planifikon të bisedojë lidhur me sigurinë e kufijve, ngecjet e buxhetit si dhe mbylljen e pjeshme të qeverisë.

Siç bëhet e ditur, tetë kongresmenë do të marrin ftesën për takim nga Departamenti i Sigurisë Kombëtare, mirëpo nuk është bërë e ditur, nëse do të ketë negociata ndërmjet udhëheqësve të Kongresit dhe administratës për t’i dhënë fund mbylljes së qeverisë, raporton RFE.

Takimi vjen një ditë përpara se Kongresi i ri të mblidhet me një shumicë të demokratëve në Dhomën e Përfaqësuesve.

Presidenti Trump po kërkon 5 miliardë dollarë për ndërtimin e murit me Meksikën, përderisa demokratët po refuzojnë të rrisin shpenzimet e kufirit në më shumë se 1.3 miliardë dollar. Ndalesa çoi në një mbyllje të pjesshme të qeverisë që filloi më 22 dhjetor.

Demokratët kanë deklaruar se planifikojnë të kalojnë dy projektligje që synojnë financimin e qeverisë. Senati i kontrolluar nga republikanët kaloi një plan thuajse identik në dhjetor.

Udhëheqësit demokratë Nancy Pelosi dhe Chuck Schumer lëshuan një deklaratë duke thënë se “do të ishte kulmi i papërgjegjshmërisë dhe cinizmi politik për republikanët e Senatit që tani të refuzojnë të njëjtin legjislacion që kanë mbështetur tashmë”.

Udhëheqësi i shumicës së senatit republikan, Mitch McConnel, tha se Senati nuk do të votojë për ndonjë projekt-ligj që nuk mbështetet nga presidenti Trump.