Pas takimit me Kosnett, Haradinaj: Kosova e vendosur të ruajë miqësinë me SHBA-në!
Kryeministri i Kosovës, Ramush Haradinaj, ka takuar ambasadorin amerikan, Philip Kosnett, me të cilin tha se kanë biseduar për intensifikimin e angazhimeve në fuqizimin e Kosovës në të gjitha aspektet.
Kosova mbetet e vendosur të ruajë miqësinë me SHBA-në, thekson Haradinaj përmes një postimi në Facebook, por nuk ka përmendur nëse është folur edhe për taksën ndaj mallrave serbe.
“Kosova mbetet e vendosur në ruajtjen e miqësisë dhe përherë besnike ndaj aleatit të saj strategjik, SHBA-së. Në takim të rregullt pune me ambasadorin amerikan në Prishtinë, Philip Kosnett, bashkëbiseduam për intensifikimin e angazhimeve të përbashkëta në fuqizimin e Kosovës në të gjitha aspektet dhe avancimin e agjendës euro-atlantike të vendit tonë,” tha Haradinaj duke përfunduar:
“Marrëdhënia e ngushtë ndërmjet Kosovës dhe Amerikës është e pacenueshme, pa marrë parasyshë dallimin eventual në opinione!”
Ndryshe, për shkak të refuzimit të heqjes së taksës ndaj Serbisë, SHBA ka ndërmarrë masën e parë: vizitën e paralajmëruar, komandanti i Gardës Kombëtare të Iowas, gjeneral major Timothy Orr, e ka anuluar. Ky mik i njohur i Kosovës, kishte planifikuar ta vizitojë Prishtinën, me rastin e 11-vjetorit të shtetësisë.
