Shqipërinë e braktisin fqinjët, në janar më pak turistë

Instituti i Statistikave, INSTAT, raportoi se hyrjet e shtetasve shqiptarë dhe të huaj në territorin shqiptar, në muajin Janar 2019 janë 574.048, krahasuar me Janar 2018, ky tregues rezulton me ulje 5,2 %.

“Në Janar 2019, hyrjet e shtetasve të huaj në vend janë 209.520. Krahasuar me Janar 2018, ky numër është ulur me 9,8 %. Në Janar 2019, ndër vendet që kanë hyrjet më të larta të shtetasve në Shqipëri, Anglia ka patur rritjen më të madhe me 7,5 %, dhe uljen më të madhe e kanë pasur shtetasit nga Maqedonia me 19,1 % Daljet e shtetasve shqiptarë dhe të huaj nga vendi, gjatë muajit Janar 2019 janë 693.657, duke shënuar një ulje me 4,5 %, krahasuar me të njëjtën periudhë të një viti më parë. Daljet e shtetasve shqiptarë nga territori i Shqipërisë, gjatë muajit Janar 2019, janë 453.831. Krahasuar me Janar 2018, ky numër është rritur 1,3 %. Daljet e shtetasve të huaj nga territori i Shqipërisë gjatë muajit Janar 2019 janë 239.826, krahasuar me Janar 2018, ky numër është ulur 13,8 %” vlerëson INSTAT.

Shqipërinë e “braktisin fqinjët”

Në muajin janar Shqipëria është vizituar më pak nga të huajt dhe më e thellë rënia ka qenë tek pjesa e fqinjëve.

Kështu maqedonasit kanë një rënie në janar 2019 në raport me janar 2018 me 19.1 për qind dhe pas saj vjen Kosova me një rënie 18.8 për qind për të njëjtën periudhë. Nga Greqia në janar 2019 kanë hyrë 2.5 për qind më pak shtetas të huaj sesa i njëjti muaj një vit më parë kurse nga Mali i Zi rënia ishte 7.7 për qind. Italia duket se është i vetmi vend nga ku hyrjet e shtetasve të huaj drejt Shqipërisë janë me rritje konkretisht 3.1 për qind.

Rënia vihet re kryesisht tek ata që e kanë vizituar vendin tonë për qëllime pushimesh me 10.4 për qind më pak se një vit më parë ndërkohë që edhe ata që kanë hyrë për arsye personale kanë pësuar në rënie me 10.1 për qind./Monitor/