Ekonomia e Turqisë bie në recesion

Turqia ka hyrë në recesion në fund të vitit të kaluar, bëjnë të ditur të dhënat zyrtare.

Sipas Institutit të Statistikave të Turqisë, ekonomia është tkurrur për 2.4% në tremujorin e katërt të vitit 2018, krahasuar me atë paraprak. Tkurrje për 1.6% ka pasur edhe në tremujorin e tretë. Rënia në dy tremujorë me radhë e përcakton recesionin, raporton RFE.

Një luftë tregtare me Shtetet e Bashkuara ka bërë që monedha turke të bie dhe importet të shtrenjtohen.

Vitin e kaluar, lira ka rënë për 30% kundrejt dollarit amerikan.

Dy vendet kanë qëndrime të kundërta për disa çështje, përfshirë mënyrën se si të luftohet grupi militant Shteti Islamik në Siri dhe planet e Turqisë për të blerë sisteme të mbrojtjes raketore nga Rusia.

Ankaraja po ashtu dëshiron që SHBA ta ekstradojë klerikun fetar, Fethullah Gulen, të cilin e akuzon për përpjekje për grushtshtet në Turqi në vitin 2016. Washingtoni thotë se nuk ka prova të mjaftueshme për ekstradimin e Gulenit.