Kongresi i PS/ Rilindja e kapur nga krimi: Nuk shantazhohemi!

Kongresi  Elektoral i Rilindjes “Bashkitë që Do Edi Rama për Shqipërinë që Do Edi Rama” filloi me një simbolikë të veçantë që po injekton kryetari i PS që nga momenti i marrjes së frenave të kësaj partie kriminale: nuk ka më shami të kuqe por atlete! Me këtë simbolikë Rama u shoqërua nga kryetari i Bashkisë së Tiranës,  Erion Veliaj, ndërsa regjia e Kongresit u kthye në vitet ’46 duke i nxjerrë të gjithë gazetarët jashtë meqë nuk i burgoste dot.

Pjesa e parë  arriti të mbyllet si Kongres Elektoral “Opozita që Do Edi Rama për Shqipërinë që Do Edi Rama” ndërsa në karremin me prezencën e Ish-kryetarit Fatos Nano u kapën vetëm ca media mediokre që nuk arritën ta shpërqëndrojnë   vëmendjen nga fjalimet kriminale të këtij Kongresi. Kishte mjaftueshëm kriminel dhe ishte pak e rëndësishme nëse do të ishte prezent apo jo!

Edi Rama me Rilindjen me mburrje shpërndanë lajmin se delegatët do të përshëndeten nga partitë simotra evropiane  madje nuk do të mungojë edhe eurodeputetja Tanja Fajon, ndonëse shqiptarët kishin filluar ta harronin pas skandalit me “Krimin Griselda” të cilën përmes Erion Velisë ajo e kishte marrë përsipër ta promovoj nëpër kancelaritë evropiane.

Taulanti i do vetëm 61 bashki!

Duke hapur Kongresin Sekretari i Përgjithshëm, Taulant Balla, tha se sot është dita e ndezjes së motorëve për të fituar të gjitha 61 bashkitë e vendit:

“Në zgjedhjet vendore të 30 qershorit jo vetëm që duhet të rikonfirmohemi në të gjitha bashkitë ku shqiptarët na kanë dhënë nderin dhe përgjegjësinë për tu shërbyer deri tani, por duhet të jemi fitues dhe të fillojmë ndryshimin edhe në bashkitë që kanë mbetur peng i kundërshtarëve tani. Sot është ndezja e motorëve për të fituar në 61 bashkitë e vendit. Duhet të adresojmë boshllëkun që na ka lënë në jetën politike të vendit mungesa e një opozite konstruktive, e cila në përgjegjshmëri të plotë politike u mundua të krijojë një ngërç artificial tërësisht të njëanshëm pas braktisjes së mandateve në Kuvend.”

Duke mos shprehë asnjë pikë pendese që bashkëpunuan me kriminelët për të fituar zgjedhjet, Taulant Balla foli për gatishmërinë për çdo lloj dialogu me opozitën ndonëse nuk e sqaroi para ose pasi të ketë fituar këto 61 bashki: 

“Sigurisht që ne i fituam zgjedhjet e vitit 2017 me një rezultat spektakolar, dhe na dha mundësinë të qeverisim vetëm në këto katër vite. Dhe unë dua të them sot në emër të këtij Kongresi se jemi të gatshëm për çdo lloj dialogu parlamentar, politik, shoqëror që mbetet e vetmja zgjidhje dhe i vetmi instrument i promovuar nga të gjitha forcat politike, në favor të vendit dhe qytetarëve.”

Edhe pse u pagëzua si Kongres Elektoral “Bashkitë që duam, për Shqipërinë që duam”, nga fjalët që morën anëtarët e këtij grupimi kriminal,  Kongresi i Rilindjes së Edi Ramës më shumë i ngjante Kongresit “Opozita që Do Edi Rama për Shqipërinë që Do Edi Rama”.

Në përfundim të punimeve të seancës së parë, Kongresi i PS miratoi deklaratën e përbashkët të kësaj force politike.

“Të vetëdijshëm se opozita në papërgjegjshmëri të plotë politike, ka krijuar një ngërç artificial duke braktisur institucionet kushtetuese të vendit, na lind detyra të përfaqësojmë pa asnjë dallim, masën e të gjithë shqiptarëve që duan një të ardhme më të mirë në vendin e tyre, një vend europian, me shumë oportunitete për gjeneratat që do të vijnë,” theksohet në deklaratë e cila vazhdon duke shitur  mediokritet se Partia Socialiste nuk mund të jetë indiferente ndaj veprimeve të dhunshme dhe anti-demokratike të partive opozitare dhe as nuk mund t’i nënshtrohet shantazheve publike jashtë kornizës kushtetuese, edhe pse tashmë PS është vetë krimi.

Dhe si gjithë fjalimet në Kongres edhe fundi i kësaj deklarate i kushtohet opozitës:

“Djegia e mandateve nga një grup i deputetëve opozitarë është një akt i pashembullt kundër parimeve të demokracisë dhe parlamentarizmit, por edhe braktisje e përgjegjshmërisë politike, kushtetuese dhe institucionale ndaj vendit dhe qytetarëve. Braktisja e Kuvendit dhe dhuna sistematike ndaj rendit institucional në Shqipëri është një goditje ndaj interesave afatgjatë të Shqipërisë, impaktojnë negativisht imazhin e vendit, minojnë procesin e reformave dhe procesin e hapjes së negociatave për anëtarësim në BE.” Vijon më tej deklarata e përbashkët e socialistëve.

Deklarata e plotë e Kongresit të PS:

Sot në Kongresin e Partisë Socialiste të Shqipërisë, vijmë me bindjen e përforcuar se jemi e vetmja forcë politike që mund të qeverisë vendin duke garantuar një ekonomi të qëndrueshme, rritje të mirëqenies së qytetarëve, punësim, shërbime publike më të mira dhe të aksesueshme për të gjithë, drejtësi sociale dhe integrim në familjen e përbashkët Europiane.

Të vetëdijshëm se opozita në papërgjegjshmëri të plotë politike, ka krijuar një ngërc artificial duke braktisur institucionet kushtetuese të vendit, na lind detyra të përfaqësojmë pa asnjë dallim, masën e të gjithë shqiptarëve që duan një të ardhme më të mirë në vendin e tyre, një vend europian, me shumë oportunitete për gjeneratat që do të vijnë.

Partia Socialiste në këto 5 vite e gjysëm është krenare për arritjet e saj në qeverisje dhe njësoj e vetëdijshme për sfidat në vazhdim. Shtetformimi dhe rikthimi i ligjshmërisë, riformatimi dhe fuqizimi i institucioneve, transformimi radikal i sistemit të drejtësisë përmes një reforme tërësore që vazhdon, reformimi i sistemit arsimor, përmirësimi i shërbimit shëndetësor dhe i shërbimeve pa pagesë, rritja ekonomike dhe mirëmenaxhimi i financave publike, rritja e punësimit, mbështetja sociale, mbështetja e fermerëve, përmirësimi i klimës së biznesit, bashkëqeverisja me njerëzit për përmirësimin e vazhdueshëm të administratës, kanë qenë kryefjala e çdo përpjekje të qeverisë për një Shqipëri më të mirë, për Shqipërinë që duam.

Tashmë në gjysmën e mandatit të dytë qeverisës, ka ardhur koha të bëjmë një bilanc realist të të gjitha premtimeve tona elektorale ku falë eksperiences së sukseshme qeverisëse, angazhimit dhe përgjegjshmërisë kemi siguruar:

Rritje ekonomike mbi 4% në 2018, niveli më i ulët historik i papunësisë 12.3%, mirëmenaxhim të financave publike, reduktim të borxhit publik, rritje e të ardhurave në 27% të PBB, investime të huaja direkte për tre vite rradhazi në nivelin rekord 1 miliardë dollarë, rritje të konsumit, rritje dy shifrore te eksporteve, rritje dy-shifrore të turizmit dhe rreth 6 milionë vizitorë në 2018.

Falë politikës së taksimit të ndershëm, përmes taksës progresive 97% e shqiptarëve dhe mbi 91% e bizneseve në Shqipëri kanë përfituar ulje të drejtpërdrejtë të barrës fiskale.

Të ardhurat neto të disponueshme të familjeve shqiptare janë rritur duke u shoqëruar me rritje të konsumit dhe mirëqënies. Përfitimet më të mëdha i kanë ndjerë familjet me të ardhura të ulëta, shtresat vulnerabël dhe të margjinalizuara të shoqërisë sonë si rezultat i uljes së varfërisë dhe pabarazisë sociale që në 2013 kishin arritur kulmin.

Të dedikuar për një politikë ndërtuese për Shqipërinë, refuzojmë me vendosmëri politikën destruktive dhe gjuhën e urrejtjes në favor të interesave thellësisht të ngushta personale, por në kundërshtim me interesat madhore të vendit. Shqipëria është një vend me vokacion europian dhe rruga jonë e vetme është Europa.

Tashmë në gjysmën e mandatit të dytë dhe në prag të zgjedhjeve lokale 2019, të tjera sfida të rëndësishme na presin, me qytetarët dhe për qytetarët e këtij vendi. Kemi bindjen që shqiptarët do të dinë sërish të zgjedhin me maturi dhe pëgjegjshmëri, në favor të stabilitetit, sigurisë, drejtësisë, mirëqenies, punësimit dhe një të ardhmeje më të mirë për vendin tonë.

Partia Socialiste është e vendosur për të çuar përpara Reformën Zgjedhore në përputhje me rekomandimet e OSBE/ODHIR të tre zgjedhjeve të fundit, duke u bazuar në tre shtylla kryesore (i) Depolitizimi i administratës zgjedhore; (ii) Sigurimi i votës për shqiptarët që jetojnë jashtë atdheut dhe (iii) Aplikimi i teknologjisë për votimin dhe numërimin elektronik.

Produkti paraprak i shkruar nga ekspertët më të mirë vendas me ndihmën e partnerëve ndërkombëtarë do t’i nënshtrohet një procesi të gjerë konsultimi para miratimit të ndryshimeve të Kodit Zgjedhor, në përmbushje të detyrimeve që burojnë prej procesit të integrimit europian.

Partia Socialiste nuk mund të jetë indiferente ndaj veprimeve të dhunshme dhe anti-demokratike të partive opozitare dhe as nuk mund t’i nënshtrohet shantazheve publike jashtë kornizës kushtetuese. Djegia e mandateve nga një grup i deputetëve opozitarë është një akt i pashembullt kundër parimeve të demokracisë dhe parlamentarizmit, por edhe braktisje e përgjegjshmërisë politike, kushtetuese dhe institucionale ndaj vendit dhe qytetarëve. Braktisja e Kuvendit dhe dhuna sistematike ndaj rendit institucional në Shqipëri është një goditje ndaj interesave afatgjatë të Shqipërisë, impaktojnë negativisht imazhin e vendit, minojnë procesin e reformave dhe procesin e hapjes së negociatave për anëtarësim në BE.

Partia Socialiste e Shqipërisë i bën thirrje Qeverisë dhe Kuvendit të vijojnë të mbeten të angazhuar e përkushtuar në garantimin dhe ruajtjen e rendit demokratik dhe avancimin e agjendës europiane të Shqipërisë.

Partia Socialiste është legjitimuar si forcë qeverisëse përmes votës së qytetarëve shqiptarë në zgjedhjet e vitit 2017. Vullneti i qytetarëve i shprehur përmes votës, legjitimiteti i qeverisë dhe afatet kushtetuese elektorale, nuk mund të deformohen me instrumente anti-kushtetues dhe akte anti-demokratike të pakicës jashtë parlamentit. Dialogu parlamentar, politik e shoqëror mbetet e vetmja zgjidhje dhe duhet të jetë i vetmi instrument i promovuar nga të gjithë forcat politike, në favor të vendit dhe qytetarëve shqiptarë. Ky Kongres vendos piketat për përgatitjen e Partisë Socialiste për zgjedhjet lokale të Qershorit 2019 dhe zgjedhjet e përgjithshme të Qershorit 2021.