Turqia sot voton

Turqia sot voton për të zgjedhur “kryetarin e bashkisë së metropolit”, “kryetarin e bashkisë”, “anëtarët e këshillit bashkiak” dhe “drejtues lokalë dhe kryepleqtë” për 5 vjet e ardhshme.

Në zgjedhjet vendore të 31 mars 2019 janë 57 milionë qytetarë me të drejtë vote, ndërsa janë 194.390 kuti të votimit, raporton TRT.

Sipas vendimit të Komisionit Qendror të Zgjedhjeve, në zgjedhje marrin pjesë Partia për Drejtësi dhe Zhvillim AKP, Partia e Turqisë së Pavarur, Partia e Bashkimit të Madh BBP, Partia Republikane Popullore CHP, Partia Demokratike, Partia Demokratike e Majtë, Partia Demokratike e Popujve HDP, Partia IYI, Partia e Lëvizjes Nacionaliste MHP, Partia Saadet, Partia Komuniste e Turqisë dhe Partia Vatan.

Numërimi i votave në prefekturat lindore të Turqisë, ku procesi i votimit filloi në orën 07:00 të mëngjesit, do të fillojë në orën 16:00, ndërsa në prefekturat tjera në orën 17.00.

Gjatë votimit televizionet dhe çdo lloj transmetuesi tjetër nuk do të transmetojnë lajme, vlerësime dhe komente në lidhje me rezultatet e zgjedhjeve deri në orën 18:00.