Klarisa!

nga Agim Popoci

Sot Rudina Hajdari i dha vulë debatit nëse deputetët e opozitës duhej të dorëzonin mandatin ose jo. Rudina me veprimin e saj sot dëshmoi se atë dhe kolegët e saj i ndanë një det i tërë edhe e pse e kanë këshilluar “ndërkombëtarët”. Dhe, po sot, një studente me emrin Klarisa Rexhvelaj i tregoi Rudina Hajdarit dhe “ndërkombëtarit” të saj Edi Rama që po e mbajnë vendin peng se si bëhet Shqipëria si gjithë Evropa!

Rudina Hajdari duke i kërkuar Parlamentit të Shqipërisë të nderoj me 1 minut heshtje viktimat e Masakrës së 2 Prillit, i mundësoi Gramoz Ruçit, ministër i Brendshëm në atë kohë dhe aktualisht Kryetar i Parlamentit, të nderoj viktimat për të cilat vetë ishte fajtor. Kjo tregon se kolegët e Rudinës që nuk u këshilluan nga “ndërkombëtarët” dhe dorëzuan mandatet për të mos u bërë palë me Edi Ramën dhe Gramoz Ruçin, kishin të drejtë. Ata dje nderuan në Shkodër, Arben Brocin, Bujar Bishanakun, Besnik Cekën dhe Nazmi Kryeziun që u vranë nga ministria që drejtohej nga Gramoz Ruçi dhe nuk mund të jenë palë me këtë njeri; Por ky akt ndonëse sqaron shumë gjëra, as ish-kolegët e Rudinës që tashmë janë në taborrin e kundërt, nuk i amniston pse Gramoz Ruçi është kryetar i Parlamentit.       

Sot, 28 vjet pas Masakrës së 2 Prillit në Shkodër, e sqaroi studentja Klarisa Rexhvelaj. Nga dita e rrëzimit të bustit të Enverit deri tek protesta e sotme e Opozitës së Bashkuar, nga Rudina Hajdari deri tek Klarisa Rexhvelaj, është një oqean i madh plotë vuajtje, mjerim, dhe gjakderdhje.

Pse u lejua Gramoz Ruçi me shok të bëjë politik e madje edhe të kthehet në pushtet, me këtë nuk merret Klarisa dhe kolegët e saj studentë; Por, pse Gramoz Ruçi vazhdoj me politikbërjen shqiptare, për të sjellë në pushtet Edi Ramën e madje të bëhet palë edhe me të bijën e Azem Hajdarit, ka një shpjegim: Ai është mjerimi në të cilën jetojnë sot shqiptarët, dh e vazhdojnë e braktisin atdheun e tyre pikërisht ashtu siç bënë pas Maskarës së 2 Prillit.

Klarisa fjalëpak dhe shumë e mençur tha sot në protestë, aty ku Rudina Hajdari nuk e gjen dot veten, se është nga ata studentë që protestuan për muaj me radhë kundër reformave të kësaj qeverie, dhe:

“Sot po ndihem si parazit në shtëpinë time, sepse prindërit e mi nuk kanë mundësi të më paguajnë shkollën në Tiranë. Ata heqin kafshatën për ne. Sot jam këtu si pasardhësve e atyre që luftuan për një Shqipëri si gjithë Europa!”

Pra, për Shqipërinë për të cilën shqiptarët vazhdojnë të përbuzen, keqtrajtohen dhe vriten nga Gramoz Ruçi dhe shefi i tij, kryeministri Edi Rama, lufton edhe sot Klarisa edhe pse kjo qeveri pretendon të na varë një trastë në shpinë dhe të ikim.

Rudina Hajdari mund të vazhdojë me ëndrrën e saj drejtë një Shqipërie me shokun Gramoz dhe kryeministër Edi Ramën; Edhe ish-kolegët e saj që sot protestojnë jashtë ëndrrës së Rudinës, për ta larguar Kryeministrin Rama; Por, rruga për ta bërë Shqipërinë si gjithë Evropa, është një dhe e vetme, ajo që ishte më 2 Prill të vitit 1991 dhe Klarisa Rexhvelaj e tha sot qartë ndër kolegët e saj të Forumit Rinor, në protestën e Opozitës së Bashkuar para Parlamentit të Shqipërisë:

“Ta shembim njëherë e mirë, bishën komuniste!”