Skadon afati/ Thaçi porosit serbët: Kush braktis Policinë, s’kthehet më…

Presidenti i Kosovës, Hashim Thaçi, porositi pjesëtarët serbë që punojnë në Policinë e Kosovës dhe institucionet tjera të sigurisë, që në rast se i braktisin këto institucione, më nuk do të kthehen aty, raporton RFE.

Sor kur skadon afati i dhënë nga autoritetet e Beogradit për serbët që të marrë vendim nëse do të largohen apo do të qëndrojnë në institucionet e Republikës së Kosovës, Thaçi përmes rrjetit social Facebook e bëri të qartë se është në vullnetin individual të secilit që të vendosë nëse do të qëndrojë apo të largohet, por:

“Nëse pjesëtarët e cilitdo komunitet largohen nga institucionet, konkretisht nga Policia dhe mekanizmat e tjerë të sigurisë, të gjithë atyre ua rikonfirmoj edhe sot se do të respektohet në plotni kushtetutshmëria dhe ligjshmëria për të gjithë. Është në vullnetin individual të secilit që të vendosë nëse do të qëndrojë apo të largohet, por një gjë është e qartë: nuk lejojmë vakuum dhe çdokush që largohet më nuk do të kthehet,” tha Presidenti i Kosovës, Hashim Thaçi duke shtuar se vendet e tyre do të plotësohen menjëherë me pjesëtarë tjerë të të gjitha komuniteteve.