Trafik droge drejt Malit të Zi, kapen 204 kg marijuanë

Policia e Shkodrës godet një tjetër tentativë për trafik të lëndëve narkotike drejt Malit të Zi. Finalizimi i operacionit policor të koduar “Liqeni” çoi në sekuestrimin e 204 kilogramë lëndë narkotike marijuanë.

Për lëndën narkotike është arrestua në flagrancë shtetasi M. K. 33 vjeç, banues në fshatin Shtoj i Ri ndërsa  u shpall në kërkim shtetasi D. B, 35 vjeç, banues në Shkodër.

“Në bazë të informacioneve policore dhe  punë operative policore  të bërë në lidhje me një grup kriminal që kryenin organizimin, financimin, transportin dhe trafikimin e lëndëve narkotike (Marijuanë) nga qyteti i Shkodrës në drejtim të Malit të Zi, në orët e para të mëngjezit  të sotëm  është  marrë informacion se dy shtetas po tentonin të trafikonin një sasi të konsiderueshme lënde narkotike. Mbi bazën e këtyre informacioneve është zhvilluar operacioni i koduar “Liqeni”.Si rezultat  në breg të liqenit Shkodër u bë kapja në flagrancë e shtetasit M.K   si dhe u shpall në kërkim D. B” njofton policia.

Në cilësinë e provës materiale u sekuestruan 204 kg marijuanë, 2  mjete një tip “Land Rover” dhe një mjet tip “Mercedes Benz” , 4 telefona celularë, si dhe mjete që i  përdornin për paketim e  lëndës narkotike.

Operacioni vijon për kapjen e shtetasit D.B.

Grupi hetimor nën drejtimin e Prokurorisë vijon hetimet  për  identifikimin dhe kapjen e bashkëpunëtorëve të tjerë në këtë aktivitet kriminal.

Materialet proceduriale i kalojnë Prokurorisë Pranë Gjykatës së Shkallës së Parë Shkodër, pasi dyshohet për veprat penale të “Trafikimit të narkotikëve“ kryer në bashkëpunim e mbetur në tentativë” dhe “Prodhimit e shitjes së narkotikëve kryer në bashkëpunim”