Kongresi i Stomatologëve të Ballkanit, zgjojnë interes studimet shqiptare
Kongresi i 24-të i Stomatologëve të Ballkanit i cili këtë vit u organizua në Tiranë, nga Shoqata “BaSS” pati një interes të jashtëzakonshëm si për temën që ishte përzgjedhur, “Qasjet bashkëkohore dhe sfidat në stomatologji” ashtu dhe leksionet dhe studimet që ishin pjesë e këtij Kongresi.
Modalitetet e trajtimit që janë zhvilluar në bazë të materialeve moderne që përdoren në stomatologjinë bashkëkohore, trajtimi i bazuar në përdorimin e teknologjive të reja si tendencë që të ndryshojë formën e Stomatologjisë së shekullit XXI si dhe sigurimi i kujdesit shëndetësor oral tek pacientët, u dëgjuan nga pedagog dhe stomatolog të shteteve të Ballkanit, në 397 leksione dhe prezantime të studimeve në këtë Kongresi të Shoqatës së Stomatologëve të Ballkanit, BaSS.
Interes të veçantë kanë zgjuar edhe leksionet dhe studimet e stomatologëve shqiptar. Njëri ndër studimet e zhvilluara në fakultet shqiptare ishte dhe ai i kryer in vitro nga stomatologia Dr.Genta Keri, “Puthitshmëria e koronave të zirkonit realizuar me masë dixhitale dhe tradicionale. Një studim krahasues.” studim ky i udhëhequr nga Dr.Sc. Brunilda Koçi.
Ky studim i referohet rritjes së përputhitshmërisë së koronave dhe rezultatet janë sinjifikative. Përdorimi i teknologjisë lehtëson sot punën e mjekut në klinikë dhe rritë komoditetin e pacientit me rastin e marrjes së masës. Dhe, redukton kohën, tha stomatologia Dr.Genta Keri, gjatë prezantimit të studimit i cili zgjoi interes tek pjesëmarrësit e Kongresit.
Në fund, organizatorët e Kongresit të 24-të BaSS i cili u zhvillua nga 09-11 Maj në Tiranë, konstatojnë se duke ndjekur traditën e saj prej më shumë se njëzet vjetë, me qëllim të mbledhjes së stomatologëve nga të gjitha vendet e Ballkanit për të shkëmbyer njohuritë shkencore dhe për të ndarë përvojat klinike për të mirën e kujdesit shëndetësor oral të njerëzve që banojnë në Ballkan, ky Kongres mund të quhet shumë i suksesshëm. Dhe jo vetëm kaq!
Ky Kongres, përveç se qëllimit të pastër shkencor arriti të ofroj dhe mbledhë së bashku stomatologë nga Ballkani dhe vendet e tjera evropiane, ku dhe u takuan miq të vjetër, profesionistë nga Ballkani dhe Evropa.
Takimi i radhës, Kongresi i 25-të i BaSS do të zhvillohet në Sarajevë nga 28-30 Maj 2020.
