Tërmeti shkund Korçën, 20 tërmete nga mëngjesi, panik dhe pasiguri tek qytetarët

Sot ishte një ditë tmerri për qytetarët e Qarkut të Korçës, ku nuk bëhet fjalë më për dëme materiale por pas 20 lëkundjeve serioze të tokës, është krijuar një gjendje pasigurie dhe qytetarët janë në panik.

Këtë e tregoi edhe tërmeti i fundit i cili ndonëse ishte me magnitudë vetëm 3.0 pasiguria bëri që ata të braktisin shtëpitë e tyre.   

Në orët e pasitës, një tërmet i fuqishëm u shënua në orën 20:50, ku sipas Qendrës Mesdhetare Sizmiologjike, EMSC, ishte me magnitudë 4.6 por e veçanta e tij ishte se lëkundjet u shënuan mbi sipërfaqen e tokës ose në thellësinë 0 km, 18 km nga qyteti i Korçës dhe 127 km nga Tirana.

Tërmeti i fundit u shënua në orën 21:31 me magnitudë 3.0 dhe thellësi vetëm 2  km, 10 km nga Erseka, 24 km nga Korça dhe 130 km nga Tirana, raporton EMSC.  

Ndërkohë Kryetari i PD-së, Lulzim Basha ka reaguar pas tërmetit që goditi mëngjesin e sotëm qytetin e  Korçës, duke kërkuar që të shpallet gjendja e jashtëzakonshme në zonën e goditur, si dhe të dedikohen fonde për shtëpitë e dëmtuara.

”Qindra banesa janë dëmtuar nga tërmeti që goditi në orët e para të mëngjesit rajonin e Korçës. Shumë banorë kanë mbetur në qiell të hapur dhe qindra të tjerë janë në panik se çfarë do të ndodhë me banesat e tyre. Gjithçka kishin ndërtuar me sakrificë të madhe është shkatërruar.

Duhet shpallur menjëherë gjendja e jashtëzakonshme në zonën e goditur dhe duhen dedikuar urgjent fonde për shtëpitë e dëmtuara. Familjeve të mbetura në mes të katër rrugëve dhe në gjendje tronditje dhe pamundësie totale shteti duhet t’ju ofrojë menjëherë ndihmë financiare dhe ushqim e strehë. Nuk duhet humbur asnjë çast për shkak të  paaftësisë apo lojrave politike, por duhet vepruar menjëherë dhe me veprime konkrete për të ndihmuar banorët e goditur.

Familjeve të mbetura në mes të katër rrugëve dhe në gjendje tronditje dhe pamundësie totale, shteti duhet t’u ofrojë menjëherë ndihmë financiare dhe ushqim e strehë.”

Ndryshe, sot qyteti i Korçës u godit nga 20 tërmete duke lënë dhjetëra banesa të shkatërruara, ndërsa 4 persona u plagosën, të cilët, fatmirësisht, ndodhen jashtë rrezikut për jetën. Epiqendra e tërmetit më të fuqishëm që u shënua sot ishte ai i orës 06:33 me magnitudë 5.0, në fshatin Floq, ku dhe janë shkaktuar dëmet më të mëdha materiale