Fitër Bajrami/ Mesazhi, H. Bujar Spahiu: Më shumë mirësi, vëllazëri, miqësi dhe dashuri!

Në prag të iftarit të fundit të muajit të shenjtë të Ramazanit dhe me rastin e Festës së Fitër Bajramit, Kryetari i Komunitetit Mysliman të Shqipërisë, H. Bujar Spahiu në urimin e tij shprehet që le të shërbejnë këto ditë feste për më shumë mirësi, vëllazëri, miqësi dhe dashuri, në të mirë të shoqërisë, kombit dhe gjithë njerëzimit.

Zoti i madhëruar thotë: “Për Mua agjëruat në muajin e Ramazanit dhe sipas urdhërit tim falët namazin e bajramit. Kthehuni tani në shtëpitë tuaja të pastruar nga gjynahet e të falur”.

Allahu ua pranoftë agjërimin, adhurimet dhe lutjet që kemi bërë gjatë këtij muaji të bekuar.

“Fitër Bajrami është ditë shprese, ditë gëzimi dhe solidarizimi. Bajrami është ftesa nga zemra në zemër, për të folur më shumë me njëri-tjetrin, për t’u dashur, për të sheshuar keqkutimet, mosmarrveshjet, mëritë dhe zënkat, për të falur e toleruar.

Të nderuar besimtarë, ta gëzojme këtë festë me familjen, farefisin, fqinjët dhe gjithë shoqërinë dhe me shpresën te Zoti që ky muaj të na ketë bërë më të mirë, më afër krijuesit e njerëzve.”

Urimi i Kryetarit të KMSH-së, H. Bujar Spahiu

Me emrin e Allahut, Mëshiruesit, Mëshirëbërësit!

Të nderuar vëllezër dhe motra, të nderuar besimtarë, sot ndahemi nga Ramazani, muaji më i dashur dhe miku më i mirë, muaji i agjërimit, lutjeve, i shpalljes së Kuranit, në të cilin nuk u kursye ndihma dhe mëshira hyjnore.

Nesër është Bajram dhe me këtë rast i uroj të gjithë besimtarët myslimanë shqiptarë kudo që ndodhen, gëzuar Fitër Bajramin. Paqe, lumturi dhe harmoni sjelltë në familjet tuaja!

Zoti i madhëruar thotë: “Për Mua agjëruat në muajin e Ramazanit dhe sipas urdhërit tim falët namazin e bajramit. Kthehuni tani në shtëpitë tuaja të pastruar nga gjynahet e të falur”. Allahu ua pranoftë agjërimin, adhurimet dhe lutjet që kemi bërë gjatë këtij muaji të bekuar.

Fitër Bajrami është ditë shprese, ditë gëzimi dhe solidarizimi. Bajrami është ftesa nga zemra në zemër, për të folur më shumë me njëri-tjetrin, për t’u dashur, për të sheshuar keqkutimet, mosmarrveshjet, mëritë dhe zënkat, për të falur e toleruar.

Të nderuar besimtarë, ta gëzojme këtë festë me familjen, farefisin, fqinjët dhe gjithë shoqërinë dhe me shpresën te Zoti që ky muaj të na ketë bërë më të mirë, më afër krijuesit e njerëzve.

Gjatë këtyre ditëve të mos mungojë vëmendja jonë ndaj fëmijëve, prindërve, të moshuarve, të sëmurëve dhe shtresës në nevojë.

Le të heshtim në vend të fjalës së keqe, e kur të flasim, të flasim bukur!

Le të shërbejnë këto ditë feste për më shumë mirësi, vëllazëri, miqësi dhe dashuri, në të mirë të shoqërisë, kombit dhe gjithë njerëzimit.

Zoti ju dhëntë mirësi e begati dhe ua pranoftë agjërimin e adhurimet që keni kryer gjatë muajit të bekuar të Ramazanit!

Edhe një herë gëzuar Fitër Bajramin,

Zoti qoftë i kënaqur me ju!

Kosovë, Tërnava bën thirrje për solidarizim!

Myftiu Naim Tërnava në mesazhin e tij me rastin e Festës së Fitër Bajramit tha se pas një muaj agjërimi nesër festohet Fitër Bajrami, të cilën e quajti arenë ku shkrihen vlerat.

“Sonte me iftarin e fundit po përcjellim muajin e ramazanit muaj që ka rëndësi të madhe për besimtarin sepse u kultivuan virtytet më të larta. Muaj ku ngritëm më shumë dashurinë ndaj Zotit për ta fituar kënaqësinë e tij. Nesër është dita e parë e Fitër bajramit që vjen pas një muaji dedikim e sakrificë për Zotin.

“Festa e Fitër Bajramit është arenë ku shkrihen vlerat. Fitër Bajrami troket në zemrat e besimtarit, në vatrat tona familjare, menjëherë pas muajit të ramazanit. Nesër kemi rastin më ë gëzuar për të festuar ditën kur besimtarët gëzohen ngase kanë kryer një nga obligimet madhorë të pesë shtyllave të fesë islame”.

Me rastin e festës së Fitër Bajramit, Myftiu Naim Tërnava bënë thirrje për më shumë solidaritet, mirëkuptim dhe dashuri mes njerëzve:

“Në prag të festës së Fitër Bajramit ftoj edhe për një unitet më të madh mes nesh, për unitet më të madh politik për të mirën e vendit tonë, për mirëkuptim më të madh. Sot jemi dëshmitarë se kemi mbetur popull i izoluar, në papunësi, e kemi për obligim që ta ndryshojmë këtë gjendje, të krijojmë një shtet të integruar, ta forcojmë paqen e solidaritetin mes njerëzve larg dhunës”.