Suela!

nga Agim Popoci

Në Shqipëri mund të jesh Suelë femër, Suelë gazetare, madje edhe Suelë e AMA-s, dhe, nuk është e lehtë. Por të jesh Suela e Agim Mustës është shumë e vështirë!

Të jesh Suelë në Shqipëri nuk është ndonjë fat, por mund të mos dorëzohesh, të luftosh për lirinë tënde, jo se do të bëhesh e barabartë ndonjëherë në këtë botë shqiptare, por do të kesh mundësi të luftosh për lirinë tënde!

Suelë gazetare në Shqipëri është paksa e ngatërruar sepse me ose pa dashjen tënde bëhesh Suela e Berishës, Ramës ose Metës! Mund të jesh Suelë gazetare me rrogë nga 25 mijë euro deri në 300 mijë lekë por nëse e  ke nda mendjen të jesh vetëm Suelë gazetare, do të përfundosh tek 300 mijë lekshi dhe mospërfillja nga kolegët tu nëse je me ose pa pranga!

Suela e AMA-s nuk është se mbanë mbi supe një privilegj pasi atje je futur në emër të partisë, dhe, me ose pa dashjen tënde është partia ajo që vendos nëse do ta ulësh dorën apo jo. Ke mundësi edhe të largohesh ose të mundohesh ti rregullosh ca gjëra të vogla që kanë të bëjnë me profesionin e gazetarit, për të cilin janë edhe ca Suela në Shqipëri që e vrasin mendjen, por jo edhe liderët e partive.

Por, versioni më i keq i Suelës në Shqipëri, pa diskutim është Suela e Agim Mustës. Një herë i përndjekur politik, gjithmonë i përndjekur politik, është postulati kriminal i komunistëve shqiptarë, që kur i shtojmë edhe përkufizimin “antikomunist”, Suela Musta nuk ka shpëtim.

Si femër shqiptare do të paragjykohet dhe do të përndjeket si antikomuniste! Si gazetare nuk do të respektohet sepse është në konflikt të drejtëpërdejtë nga ata që i zotërojnë mediat shqiptare sot. Si anëtare e AMA-s, pak rëndësi ka nëse do të votoj për ose kundër, gjithmonë, në rastin më të keq ajo do të akuzohet si Suela e Agim Mustës!

Po çfarë mund të ketë mësuar vallë Suela nga i ati Agim Musta në gjithë katrahurë.

I ati, e ka edukuar qartë Suelën se atdheu në çdo rrethanë duhet dashur madje edhe kur ai qeveriset nga kriminelët komunistë; Dhe, e tillë ishte Suela!

I ati, nuk ka ndjellë urrejtje por i ka bërë të qartë Suelës se çfarë do të thotë kur mohohet fjala e lirë; Dhe, e tillë ishte Suela!

Dhe në fund, I ati, i ka bërë të qartë Suelës se çfarë do të thotë të jesh e bija e Agim Mustës; Dhe, e tillë ishte Suela!

Bota normale mund të çuditet se si një trafikanti ndërkombëtar të drogës si Saimir Tahirit nuk kishte guxim njeri që ti vinte prangat; Bota normale mund të çuditet se ç’lidhje ka një njeri që vret si Florenc Çapja, që të arrestohet me një gazetare e anëtare të AMA-s që akuzohet për “korrupsion”; Por Agimi dhe Suela nuk çuditen kur arrestohet Suela e Agim Mustës!

Kur i hapën portën e burgut Agim Mustës nuk i tha njeri se është kthyer në liri! Këtë e ndjeu ai ende pa shkuar të shtëpi, aty ku muri kishte vesh, dushi kishte sy dhe pjata kishte jo vetëm bukë dhe gjellë, por edhe vesh e sy!

Pse iu vënë prangat Suelës së Agim Mustës, e ka thënë shumë kohë parë i ndjeri Azem Hajdari dhe kështu do vazhdoj të jetë nëse shqiptarët e kanë ndarë mendjen të jetojnë me frikë dhe në terror edhe në të ardhmen: Komunizmi deri sa të jeton, VRET!