Presidenti Trump i kërkon Putinit të mos ndërhyjë në zgjedhje

Presidenti amerikan, Donald Trump dhe homologu i tij rus, Vladimir Putin janë pajtuar për të punuar drejt përmirësimit të marrëdhënieve në mes të të dyja shteteve, në takimin e tyre të parë, prej kur është publikuar raporti amerikan që konfirmon se Moska ka ndërhyrë në zgjedhjet amerikane, raporton RFE.

Në takimin që u zhvillua sot në Osaka të Japonisë ku po zhvillohet Samiti i 20 vendeve më të industrializuara, G-20, Presidenti Trump i ka kërkuar Putinit që të mos ndërhyjë në zgjedhjet e ardhshme presidenciale.

Bazuar në një deklaratë të lëshuar nga Shtëpia e Bardhë pas takimit 80-minutësh, theksohet se janë arritur pritshmëritë, që nuk kanë qenë të mëdha për këtë takim.

“Të dy liderët janë pajtuar se përmirësimi i marrëdhënieve në mes të Shteteve të Bashkuara dhe Rusisë është në interesin e përbashkët të të dyja shteteve dhe gjithë botës,” thekson deklarata.

Të dy liderët kanë diskutuar edhe për situatën në Iran, Siri, Venezuelë dhe Ukrainë.

Ndryshe, ky takim është i pari pas Samitit të mbajtur në Helsinkinë korrik të vitit të kaluar.

Në Samitin G20, që u zhvillua, në Argjentinë, në nëntor të vitit të kaluar, Presidenti Trump refuzoi ta takoi Putinin pasi Rusia kapi dy anije ukrainase dhe ekipet e tyre në Detin Azov. Megjithatë, ata kanë përmendur shumë pak këtë çështje në margjina të atij organizimi.

Shtëpia e Bardhë, përmes deklaratës thekson se “presidentët janë pajtuar për të vazhduar diskutimet në modelin e shekullit 21 për kontrollin e armëve, për të cilin presidenti Trump ka vlerësuar se duhet përfshirë edhe Kinën”.

Ndryshe, Traktati për Armë Bërthamore me Rreze të Mesme skadon në muajin gusht. SHBA ka akuzuar Rusinë për moszbatim të marrëveshjes, dhe të dyja shtetet kanë hequr dorë nga ajo.