KED nis intervistimin e kandidatëve për Gjykatën Kushtetuese

Këshilli i Emerimeve në Drejtësi, KED, nisi sot intervistimin e kandidatëve për anëtarë të Gjykatës Kushtetuese dhe vendin vakant të Inspektorit të Lartë të Drejtësisë.

Sot KED përcaktoi edhe kalendarin e intervistave për të gjithë kandidatët të cilët janë lejuar që të marrin pjesë në garë dhe miratoi ekspertët e gjuhëve të huaja për intervistimin e kandidatëve të ILD e Kushtetueses.

Kandidati i parë për Gjykatën Kushtetuese që i është nënshtruar sot intervistimit ka qenë Besnik Muçi. Burime brenda KED thanë se ndaj Muçit anëtarët e KED kanë bërë pyetje të përgjithshme në lidhje me atë çfarë ai pretendon të sjellë në vijim nëse zgjidhet anëtar i Gjykatës Kushtetuese.

Mbledhja e radhës do të mbahet në datën 9 gusht, ora 10:00.

Pas intervistimit, KED do të dërgoj emrat e kandidatëve për Gjykatë Kushtetuese dhe Inspektor të Lartë të Drejtësisë në Kuvend dhe Presidencë. Pas dorëzimit të listës, Kuvendi dhe Presidenca kanë një afat një mujor për të emëruar 6 gjyqtarë në Gjykatën Kushtetuese.