Kosovë-Serbi, Merdare, gjendet vajza shqiptare në hapësirën ku mbahet goma rezervë

Në vendkalimin Merdare në kufirin Kosovë-Serbi është kapur një vajzë shqiptare 9-vjeçare në përpjekje për të kaluar ilegalisht kufirin me makinën e cila po lëvizte nga Kosova drejtë Gjermanisë.

Drejtoria e Doganave të Serbisë ka bërë të ditur se vajza shqiptare u gjetë në hapësirën ku mbahet goma rezervë në makinën e tipit “Chrysler” me targa gjermane, raporton Televizioni publik i Serbisë, RTS.

Makina drejtohej nga një 42-vjeçar, ndërsa si pasagjer ishte i biri i tij 17 vjeçar, të dy të kombësisë shqiptare.

Me rastin e kontrollit rutinë, doganierëve u është thënë se nuk kanë asgjë për të deklaruar. Mirëpo, pas kontrollit të makinës, në bagazh, në hapësirën e gomës rezervë është gjetur një vajzë 9 vjeçare, e kombësisë shqiptare, dokumentet e së cilës janë gjetur në brendësi të makinës, dhe ku u konfirmua se fëmija është nga Podujeva.

Pasi u gjetë vajza 9-vjeçare, drejtuesi i makinës është shprehur se fjala është për vajzën e motrës e cila jeton në Gjermani. Fëmija po luante mbrapa dhe se rastësisht është gjetur në atë hapësirë. Vajza 9-vjeçare është strehuar në Qendrën për Punë Sociale në Prokuple të Serbisë. Të dyshuarit i është caktuar masa e paraburgimit prej 48 orëve, kohë pas së cilës policia serbe thotë se do ti dorëzohet Prokurorisë.