Shteti i Mihalit!

nga Agim Popoci

Gjashtë vjet më parë, Restorant “Panorma” ishte e Zotit dhe mikut të Mihal Kokëdhimës; Pra, Edi Ramës! Mbaroi fushata zgjedhore dhe Mihali filloi të flas poshtë e lartë se është miku i Edi Ramës. Kur miku i tij mori pushtetin, ai u bë Perëndia e zonës! Kaluan shumë pak javë nga ky privilegj dhe ai e kuptoi se si funksionon ky shtet, që tashmë ishte, Shteti i Mihalit!

Pa leje ndërtimi, pa liçencë, pa tatim dhe pa drita, Mihali e kuptoi se mund të bësh biznes në këtë vend të çmendur sepse mjafton të jesh, miku i Edi Ramës!

Këtë titull ia pranoi edhe pushteti vendor, inspektorët që i suleshin Jugut në sezonë turistike dhe task-forcat nga më të ndryshmet.

Por Mihali deri këtu mendoi se nuk e kishte tepruar teksa shikonte se kishte nga ata “miq” të Kryeministrit që mbjellin, transportojnë dhe shesin drogë, që ishte ku e ku më larg se sa biznesi i një restoranti që përdorej edhe nga vetë Kryeministri në kohë fushatash zgjedhore, gjë që nuk ndodhte me parcelat e drogës.

Këtu, llogaritë e Mihalit u bënë gabim sepse mendësia e tij komuniste nuk pranonte vlerën e çmuar edhe të asaj që nuk ishte “shtab zgjedhor”, ndryshe do të qartësohej pse bëhet blerja e votës dhe pse gjithçka e paligjshme në këtë shtet i duhet Edi Ramës për korr fitoren zgjedhore.

Duke i lënë anash legjendat urbane mbi mospagesën e peshkut nga milioneri  spanjoll, Eugenio Galdón, mjaftojnë pamjet e publikuara me Mihalin mbi furgonin që transportonte Galdón, për të konfirmuar se Mihali e kishte keqkuptuar Mikun dhe Shtetin të cilin ai e drejtonte.

Edi Rama mund ta lejonte që për disa orë dhe ditë “Panorma” të ishte e Zotit dhe mikut të Mihalit, por jo që ta ndante edhe Shtetin me Mihalin, dhe këtu gjërat u ngatërruan paksa.

Edi Rama nuk reagoi kur ai zgjeroi biznesin dhe pushteti lokal nuk guxonte ta kthente kokën nga “Panorma” sepse Mihali ishte miku i tij;

Edi Rama nuk reagoi kur Mihali i largonte tatimorët duke ju thënë se ishte miku i tij;

Edi Rama nuk reagoi as kur Mihali ç’lajmëroi biznesin dhe punonte pa liçencë sepse ishte miku i tij;

Edi Rama nuk reagoi as me rastin e kontrollit që iu bë plazheve nga Velipoja në Sarandë dhe çadrat ai i kishte pa asnjë lloj leje sepse Mihali ishte miku i tij;

Edi Rama nuk reagoi me fadroma edhe kur milioneri spanjoll, Eugenio Galdón u terrorizua! Ama kur Mihali i arrestuar tha në Gjykatë se ishte miku i Edi Ramës, kjo pikë derdhi gotën e tyre të miqësisë!

Për pak orë pas kësaj deklarate, i gjithë aparati shtetëror u ngrit në këmbë. Restoranti, plazhi, çadrat dhe miqësia u shtypën me rulin e IKMT jo, siç u tha, për rikthimin e normave dhe normalitetit në Porto Palermo, sepse aty nuk kishte as norma dhe as normalitet. As për ti treguar Ish-Shefit të kabinetit të kryeministrit spanjoll Adolfo Suárez dhe Ish-Drejtor i grupeve mediatike Prisa e COPE, themeluesi i ONO dhe sot biznesmen i suksesshëm, Eugenio Galdón, se Mihal Kokëdhima nuk është mik i Edi Ramës.

Por, për ti treguar të gjithë atyre “miqve” që kanë përdor dhe përdorin emrin e Kryeministrit poshtë e lartë, se cili do të jetë fati i tyre gjatë këtyre pak ditëve sa ka ngelë nga pushteti i Edi Ramës.

Sepse, sot, në Shtetin e Mihalit të gjithë e kanë të qartë, dhe ata që nuk kanë parë gjë akoma kanë ngelë vetëm, MIQTË!