Qeveria e Brazilit refuzon ndihmën për Amazonën. Macron s’na jep dot leksione…

Qeveria e Brazilit refuzojë ofertën për ndihmë nga G7 për fikjen e zjarreve në pyjet e Amazonës, raporton RFE.

Presidenti i Francës, Emmanuel Macron, i cili ishte nikoqir i samitit të G7-ës, që përfundoi dje tha se është rënë dakord për 22 milionë dollarë ndihmë.

Zyrtarët brazilianë nuk dhanë arsye për refuzimin e parave, por presidenti Jair Bolsonaro e akuzoi Francën për trajtimin e Brazilit si koloni.

Ministri i tij i Brendshëm, Fernando Azevedo e Silva, tha se zjarret në Amazonë nuk janë jashtë kontrollit.

Një numër rekord i zjarreve e ka përfshirë rajonin e Amerikës Jugore, shumica e tyre në Brazil, duke nxitur shqetësim ndërkombëtar, për shkak të rëndësisë së Amazonës për mjedisin global.

Kritikët e kanë akuzuar Bolsonaron për përkeqësimin e shpyllëzimit në Amazonë përmes retorikës antimjedisore.

Shefi i stafit të Bolsonaros, Onyx Lorenzoni, tha se fondet e ofruara nga vendet e G7-ës “mund të jenë më të rëndësishme për pyjet në Evropë”.

“Macron nuk mund të shmangë një zjarr të parashikueshëm në një kishë që është pjesë e trashëgimisë së botës dhe ai dëshiron të na japë mësime për vendin tonë”, tha Lorenzoni për “Globo”, duke iu referuar zjarrit që përfshiu katedralen Notre-Dame në Paris në muajin prill.