Uragani Dorian, rritet numri i viktimave…

Numri i viktimave nga Uragani Dorian në Bahamas ka shkuar në 43, kanë bërë të ditur mediat amerikane.

Duke ju referuar deklaratës së përfaqësuesit të kryeministrit Hubert Minnis, NBC raporton se numri zyrtar i viktimave ka shkuar në 43 dhe se pritet që ky numër të rritet dukshëm edhe më tej .

The Washington Post raporton për 35 viktima si pasojë e stuhisë në ishullin Abacos, dhe 8 në Bahama të Madhe. 

Kërkimi i të zhdukurëve dhe misionet e shpëtimit vazhdojnë.

Uragani i kategorisë së pestë i cili shkatërroi gjithçka që i doli para në Bahamas, deri në bregdetin amerikan në Karolinën e Jugut dhe të Veriut, për fat arriti dukshëm i dobësuar, si uragan i kategorisë së parë. Përkundër kësaj, 280.000 shtëpi dhe kompani kanë mbetur pa energji elektrike.

Uragani Dorian edhe pse është dobësuar, theksojnë ekspertët, ai vazhdon të shoqërohet me erëra të forta  dhe paraqet rrezikshmëri për jetën dhe pronën e njerëzve në këto shtete si dhe Virginia. Për këtë arsye, guvernatorët e këtyre shteteve kanë shpallur gjendjen e jashtëzakonshme, kanë mbyllur shkollat, kanë hapur strehimoret dhe në gardën kombëtare është rritur niveli i gatishmërisë. Në Karolinën e Jugut dhe të Veriut është dhënë paralajmërimi për evakuimin e 900.000 njerëzve, por ende nuk dihet se sa është respektuar.