Zgjerohen hetimet për rastin “Reketi”, edhe katër të dyshuar
Nënkryetarja e Parlamentit të Maqedonisë së Veriut, Frosina Remenski është e dyshuara e re në skandalin e njohur “Reketi”.
Frosina Remenski dhe katër persona të tjerë, emrat e të cilëve nuk janë publikuar, dyshohen të jenë përfshirë në zhvatjen e 1.5 milionë eurove nga biznesmeni, Orce Kamçev, raporton RFE.
Për këtë rast në paraburgim ndodhet edhe ish-kryeprokurorja speciale, Katica Janeva dhe dy persona të tjerë, Boki Jovanovski dhe Zoran Milevski.
“Prokurori nga Prokuroria publike për krimin organizuar dhe korrupsionin ka urdhëruar nisjen e hetimeve kundër pesë personave fizikë dhe një personi juridik për shkak të dyshimeve se i dyshuari i parë ka kryer vepër penale ‘mashtrim’ ndërsa të tjerët i kanë ndihmuar në kryerjen e kësaj vepre penale. Tre nga këta persona kanë ndihmuar edhe në veprën penale ‘pastrim parash’. Katër nga personat e dyshuar janë përfshirë edhe në transferim të 720 mijë eurove përmes organizatës ‘Lidhja Ndërkombëtare’,” thuhet në njoftimin e prokurorisë.
Për të dyshuarin e parë, Prokuroria ka kërkuar masa kujdesi, marrjen e pasaportës dhe paraqitjen e rregullt në gjykatë.
Duke folur për zgjerimin e hetimeve për këtë rast, Kryeministri Zoran Zaev tha se ende nuk ka të dhëna të sakta, por nëse vërtetohet përfshirja e zyrtares së partisë së tij, ajo duhet të përballet me drejtësinë.
“Kur ndonjë person dyshohet, akuzohet ose diçka të ngjashme, atëherë do të zbatojmë masat e sanksioneve, që do të thotë largimin e përkohshëm të atij personi nga partia deri sa të dëshmohet pafajësia. Dyert janë të hapura gjithmonë për secilin,” tha Zaev.
Rasti “Reketi” ka nxitur tensione të shumta në skenën politike që ka çuar edhe në rrënimin e kredibilitetit të Prokurorisë Speciale, për faktin se drejtuesja e këtij organi të akuzës, Katica Janeva është burgosur për shkak të përfshirjes së saj në këtë rast.
Në fakt, Janeva në bazë të dëshmive të publikuara, ka siguruar biznesmenin Orce Kamçev se do të përfitonte lehtësira në një proces gjyqësor kundër tij pasi t’i ketë dhënë paratë të akuzuarit të parë, Boki Jovanovski.
