Rektori Statovci, pranë studentëve në kohët më të vështira

Sot është përkujtuar në 20 vjetorin e ndarjes nga jeta, profesori dhe rektori i Universitetit të Prishtinës, Ejup Statovci. Parlamenti i Studentëve të Universitetit të Prishtinës ka mbajtur orë përkujtimore kushtuar jetës dhe veprave të rektorit Statovci, ku është përmendur angazhimi i tij i vazhdueshëm për universitetin, lirinë dhe pavarësinë e Kosovës.

Prorektorja Luljeta Badivuku tha që edhe sot e kësaj dite profesor Statovci mbetet shembull për të gjithë.

“Figura si rektori Statovci janë nga ato që historia ruan faqe të veçantë nderi për to. Të gjithë ata që e njohëm, ai paraqiste figurën e një intelektuali e ishte pranë universitetit, popullit dhe studenteve, duke iu prirë ndryshimeve më të nevojshme e pozitive në vend, në kohët më të vështira,” tha Luljeta Badivuku.

E profesori Avdullah Aliu, bashkëpunëtor i profesor Statovcit tha se ai u angazhua gjithmonë për lirinë dhe pavarësinë e Kosovës.

“Profesor Statovci në mënyrë të shkëlqyeshme hyri në botën e ndërlikuar të drejtësisë, adhuronte botën shkencore. Entuziazmi i tij për punë shkencore dhe kombëtare ishte deri në ditën e fundit të jetës së tij. Profesor Statovci kontribuoi edhe në afirmimin e kuadrove të reja. Ai u angazhua edhe në aktivitete që kishin për qëllim barazinë dhe lirinë dhe pavarësinë e Kosovës”, tha ai.

Pas orës përkujtimore, do të bëhen homazhe pranë varrit të profesor Ejup Statovcit.