Edi Ra!

nga Agim Popoci

Kryeministri Edi Rama në delirin e tij kur dhe krijoi bindjen se uji, toka dhe ajri në Shqipëri janë nën kontrollin e tij, u tha shqiptarëve se nëse nuk çelen negociatat me BE, dielli do lindë përsëri, deklaratë që irritoi shumë kundërshtar dhe mbështetës të tij.

Pse Edi Rama mendon se Dielli do të lindë në Shqipëri kur thotë ai, pra, pse është dhe Perëndia e Diellit, vetëm ai nuk ka faj!

Në Egjiptin e lashtë Perëndia e Diellit, Ra, identifikohej si Dielli, dhe manifestohet në disa forma të tjera: si Atum, ose dielli në mbrëmje; si Khepri, ose dielli në mëngjes, përshkruar si një bletë; dhe si Horakhty, i njohur tashmë nga Sfinksi i Madh në Giza. Ra ishte në krye të një grupi prej nëntë perëndish, të cilat së bashku njiheshin si Enneadi i Madh dhe ishte gjykatësi suprem i të vdekurve.

Kështu ndodhë dhe me Edi Ramën, që nga viti 1998 kur erdhi nga rrugët e Parisit në pushtet, si në mbrëmje ashtu dhe në mëngjes, me Fatos Nanon ose Ilir Metën, kioskat ose kullën e Dash Pezës, Griseldën ose 21 Janarin, Angela Merkel ose Johahnnes Hahn, Emmanuel Macron ose Maqedoninë e Veriut.

Nuk e kishte kuptuar por përdhosja që i bëri Komisioni Hetimor si Kryetar i Bashkisë Tiranë, i çeli sytë për ta pasur të qartë se ishte bërë Edi Ra i kryeqytetit shqiptar. Pa Kanun por me Sopatë, pa Kushtetutë por me lejen e Ilir Metës, Edi Rama e bënte Tiranën të vërejtur ose me diell, kjo varej vetëm prej tij. Dhe, ai nuk u ndalë në Tiranë ndonëse nga zyra e Kryetarit të Bashkisë e nxjerri Lulzim Basha.  

Gjykatës suprem të të vdekurve nuk kishte por bërthama e tij komuniste i tha se një ’97 i bëjmë kur t’ia do zemra edhe pse Shqipëria tashmë ishte anëtare e NATO-s. 21 Janari dështoi në variantin komunist, por aty ishte Beogradi për ta sjellë në pushtet. E tërhoqi Ilir Metën zvarrë dhe e detyroi ta braktis qeverinë e Sali Berishës për të ardhur në pushtet Edi Rama. E ky, nuk tradhtoi variantin e parë të qeverisjes së shqiptarëve dhe erdhi në krye të fronit, jo me shumë premtime por me shumë gënjeshtra!

Me ardhjen në pushtet, Edi Ra erdhi edhe në krye të një grupi prej nëntë kriminelësh, të cilët së bashku tashmë njihen si “rilindje” dhe paraqesin gjykatësin suprem të të vdekurve.

Si Atum, Edi dilte me fishekjzarre dhe njerëzit mrekulloheshin ndërsa ai thurrte plane se si ti shtypte shqiptarët më shumë që ta respektonin! Filloi me Lamçen sepse Shkreli ishte lodhur me shërbimin që i kishte bërë nga Piramida deri tek kangjellat e Presidencës. Kartonat e legalizimit që u dhanë shqiptarëve, u shërbyen që të  qartësohen se cilës shtëpi ose biznes shqiptar do ti fusin tritolin me letra shtetërore në dorë ndërsa partneri i Lamçes për propagandë, u kujdes për bregdetin shqiptar.

Por edhe si Khepri, Edi ishte po ai edhe pse ishte mëngjes, sepse nuk kishte ardhur për të qeveris një Shqipërie drej Bashkimit Evropian. Ndërsa shumë shqiptarë, e në veçanti ata që i përkisnin partisë rivale, e kuptuan se Edi Rama dhe Ilir Meta nuk kishin ardhur për të qeverisur por për të shkatërruar dhe vjedhur, filluan ta braktisin vendin. Por Edi Ra kishte nevojë edhe për pesë Perëndi që ta plotësonin gjykatësin suprem të vdekjes. Kështu ai përzgjodhi Saimir Tahirin, Damian Gjiknurin, Ilir Beqjen që së bashku me Nexhmije Hoxhën dhe Fatos Klosin, do t’ia arrijnë qëllimin që si nëntëshe e zezë, ta realizojnë vdekjen e këtij kombi.

Me Saimir Tahirin nuk luftoi krimin por e kultivoi atë. E mori vendin pa skafe me refugjatë që i instaloi sigurimi pas rënies së pushtetit komunist, dhe e bëri një vend me skafe me drogë. Përmbyti vendin me drogë, e të lashtat shqiptare i zëvendësoi me marijuanë, duke sjellë vetëm krim, gjak, shamizeza dhe tokë të djegur.

Me Damian Gjiknurin solli një formë qeverisjeje ndryshe me pasuritë natyrore. E filloi me linjën e interkonjeksionit me Kosovën për të cilën e kishte akuzuar aq shumë Sali Berishën ndonëse e kishte të qartë se kjo linjë nuk kishte se ku të kyçej dhe projekti ishte vepër e Kompanisë së Fazlliçit, të cilën aq shumë e kishte akuzuar kur ishte në opozitë. Sidoqoftë e bëri, nuk e lidhi me asgjë sepse e kishte të qartë se këtë nuk e lejonte Aleksandar Vuçiç, por i shërbeu për të konstatuar nëse reagon njeri në vendin e shqiponjave. Të gjithë heshtën!

Dhe, Edi Ra vazhdoi punë. Hajdutët që blenë dhe vodhën vota për rilindjen, Damiani i shndërroi në oligarkë për t’iu shpërndarë më pas edhe ca PPP kur ata kishin krijuar idenë se ishin ngopur. Ca kontrabandistë nafte me gomarë, i bëri sheik të naftës shqiptare, ndërsa minierat i dorëzoi atyre që kishin marrë ti shisnin 200 kasetofona në Pazar.

Dhe pazëlli do të plotësohet me injorantin më të madh të nëntëshes, Ilir Beqjen në duart e të cilit vërtitej shëndetësia shqiptare, të cilën Edi Ra e kishte premtuar pa pagesë. Kështu dhe ndodhi! Por, pa pagesë nuk ishte për popullin e mjerë shqiptarë por për nëntëshen e zezë dhe bashkëpunëtorët e tyre. Beqja ishte në shëndetësi gjithçka, edhe mjek, edhe farmacist, edhe laborant e madje edhe arkitekt kur duhej të ndërhynte për të treguar se ku duhet të vendoset recepsioni i spitalit. Kur iu shterua kreativiteti, Edi Ra i lëshoi në dorë PPP-të në mënyrë që të mos u jep koncesione njerëzve që kanë lekë por analfabetëve. Kështu dhe ndodhi, Beqja nuk e zhgënjeu, dhe gjithçka që funksiononte në shëndetësinë shqiptare e dha me koncesion.  

Momentet e qetësisë që vinin me dallgë të ndryshme, i trazonte me IKMT-në që kishte gjithmonë tritolin në dorë, OSHEE-në gjithmonë e gatshme për prerjen e linjave blu dhe Policinë e Shtetit të cilën e përdori si për kërcënimin dhe përdhosjen e  rivalëve politikë, ashtu dhe për kultivimin dhe shitjen e drogës. Dhe, të gjitha për qenë në pushtet deri sa të “blejë” edhe diellin.

Kur e krijoi idenë se rehatoi kombin në kufijtë zyrtar, dikush i tha se ata jashtë kufirit janë më të pabindur. Zgjidhjen mendoi se e gjeti me ca batonë ndërsa vëllai i tij Aleksandar Vuçiç i ndihmoi me një pritje madhështore në Beograd. Për 24 orë u shndërrua edhe në patriot por sërish gjykatësi suprem i të vdekurve i tërhoqi vërejtjen se kanë mbetur dhe ca gjëra nga kombi shqiptar. Duk e kthyer nga takimi me batonët, për një moment e kuptoi se sa e lehtë është të shkosh në Prishtinë dhe se po lëvizte në rrugën e kombit. Thirri njërin prej atyre kontrabandistëve të naftës që kishte, dhe, Rrugën e Kombit e shndërroi në Rrugën e Haraçit! E për ti vënë pikën mbi zhdukjen e kombit, gjykatësi suprem i kujtoi bashkimin me Serbinë, punë të  cilën e kishte lënë në mes lideri i tyre shpirtëror, Enver Hoxha. E pagëzuan Minishengen për të lëvizur në Serbi, Shqipëri dhe Maqedoni të Veriut, 3 liderët e këtyre shteteve që kanë të drejtën e lëvizjes së lirë në gjithë Zonën Shengen, duke përfshirë këtu edhe këto tre shtete me liderë idiotë!    

Radha i erdhi çeljes së negociatave me Bashkimin Evropian. Duke e pasur të qartë se qeverisë me një shtet kriminal kokë e këmbë, Edi Rama, iu drejtua kombit shqiptar duke e garantuar para marrjes së vendimit nga BE, se negociatat mund të mos çelen por Dielli do të lindë përsëri. BE normalisht i tha JO dhe Dielli lindi! Shqiptarët falënderuan Edi Ra dhe Diellin që ka në dorën e tij sepse jeta vazhdoi edhe me Shqipërinë pa negociata me BE-në ndërsa gjykatësi suprem i të vdekurve është i kënaqur me jetën kaq të zezë që ka arritur t’iu servir shqiptarëve.    

Sot Edi Rama fle gjumë si Atum dhe zgjohet si Khepri por vetëm një gjë nuk e ka pasur parasysh kur krijoi gjykatësin suprem të të vdekurve. Shqiptarët nuk do ti çoj në BE, mund ti çoj drejt theqafjes e ata për momentin heshtin, dhe, Dielli do të lindë përsëri, nesër; Por, Pultin e Diellit nuk e ka në dorë, pavarësisht se është, Edi Ra!