Edi Rama dhe Minishengeni, Kurti: Kryeministrin e Shqipërisë do ta takoj…

Deklaratën Kurti e bëri nga Tirana, Pas aktivitetit të organizuar nga Qendra e Lëvizjes Vetëvendosje në Tiranë për fitoren e kësaj partie në zgjedhjet parlamentare të Kosovës më 6 Tetor, Kryetari i Lëvizjes dhe Kryeministri i ardhshëm i Kosovës, Albin Kurti ka sqaruar disa prej çështjeve që ishin me interes për mediat që transmetuan këtë event ku mbizotëruan Minishengeni absurd për të cilin zhvilluan takim në Novi Sad kryeministrat e Shqipërisë dhe Maqedonisë së Veriut si dhe Presidenti i Serbisë, takimi i tij me Edi Ramën dhe në fund përfshirja e Vetëvendosjes në jetën politike në Shqipëri.

“Mendoj që duhet të kemi kujdes sa i përket raporteve me Serbinë meqenëse dihet se çfarë u ka bërë Serbia shqiptarëve nga njëra anë dhe dihet që para tre viteve tentoi një puç në Maqedoni të Veriut por i dështoi, një puç bashkë me Rusinë. Është në interes të Serbisë që të duket sa më normale ndërkohë që nuk është,” tha Albin Kurti ndërsa sqaoi se pse nuk e ka takuar Kryeministrin e Shqipërisë dhe kur do të ndodhë një takim i këtij niveli:

” Nuk jam në një vizitë zyrtare, kam ardhur të festoj fitoren e Vetëvendosjes dhe ti falenderoj të gjithë aktivistët dhe vullnetarët të cilët nga Tirana dhe vende të tjera të Republikës së Shqipërisë erdhën dhe na e mundësuan fitoren e përbashkët në Kosovë. Do kthehem sonte në Kosovë por do ta takoj së shpejti kryeministrin e Shqipërisë. Është çështje ditësh dhe jo javësh kjo punë.”

Ndërsa radhët e Lëvizjes Vetëvendosje po shtohen çdo ditë në Tiranë, pjesëmarrjen në zgjedhjet e ardhshme parlamentare në Shqipëri të kësaj Lëvizje, Albin Kurti e la të hapur.

“Unë jam këtu me ftesë të qendrës së Lëvizjes Vetëvendosje të Shqipërisë dhe këta e kanë autonominë e qëndrimeve dhe të veprimeve. Nuk është se unë apo Vetëvendosje në Kosovë e diktojmë një gjë të tillë.”