Krimi e kuptoi mesazhin e Kryeministrit/ Atentat, mbetet i plagosur prokurori Arjan Ndoji

Një ngjarje e rëndë ndodhi pasditen e sotme në Durrës, ku tre persona mbetën të plagosur si pasojë e të shtënave me armë zjarri. Ndërkohë, mësohet se mes personave të plagosur është edhe prokurori Arjan Ndoji.

Dyshohet se shënjestër e atentatit ka qenë pikërisht prokurori Ndoj, i cili disa javë më parë u akuzua nga Kryeministri Edi Rama për lidhje me bandat kriminale; Mesazh të cilin krimi e kuptoi mirë dhe veproi.

Sipas policisë së Durrësit, sot në Mbikalimin e Shkozetit i plagosur mbeti prokurori Arjan Ndoj dhe dy të tjerë. Njëri nga të plagosurit që thuhet se është shoferi i tij, Andi Maloku, është nisur për mjekim të specializuar në Spitalin e Traumës në Tiranë. Ndërkohë i plagosur ka mbetur dhe Aleksandër Laho, me të cilin thuhet se Ndoj ka miqësi të vjetër.

“Ne aksin rrugor Durrës-Tiranë në afërsi të mbikalimit të Shkozetit, rreth orës 16:30, në afërsi të vendit të quajtur “Mbikalimi i Shkozetit” kanë qëlluar me armë zjarri në drejtim të mjetit me targa AA 333 ZD, e për pasojë janë plagosur shtetasit A.L., 48 vjeç, A.N., 44 vjeç dhe A.M., 30 vjeç.

Shtetasi A.M. është nisur për mjekim të specializuar në Spitalin e Traumës në Tiranë, ndërsa dy shtetasit e tjerë ndodhen në Spitalin Rajonal Durrës, jashtë rrezikut për jetën.

Policia e Durrësit është vënë në ndjekje të autorëve, po krihet zona dhe në të gjitha akset rrugore që lidhen me Durrësin janë ngritur pika kontrolli.
Për zbardhjen e ngjarjes është ngritur menjëherë një grup i posaçëm hetimor nga Departamenti i Policisë Kriminale, Prokuroria e Rrethit Gjyqësor Durrës dhe Drejtoria Vendore e Policisë Durrës. Policia e Shtetit fton këdo që mund të ofrojë informacion në ndihmë të hetimit të shpejtë të ngjarjes të telefonojë falas në numrin 112.”, thuhet në njoftimin e policisë.

Ndryshe, pas arrestimit të Ish-Drejtorit të Kadastrës së Durrësit, Liridon Pula, me urdhë të prokurorit Arijan Ndoja, Kryeministri Edi Rama në datën 7 tetor, nga foltorja e parlamentit lëshoi akuza të forta ndaj prokurorit të Durrësit, Arjan Ndoj, ndërsa tha se ai bashkëpunon me bandat kriminale dhe ushtron presion e shantazh mbi zyrtarët e administratës.

“Ju e patë vetë javën e kaluar, të transformimit të një figure të sistemit të drejtësisë me përfaqësues të interesave të krimit, që sigurisht nuk do t’i shpëtojë ndëshkimit, por ama kur vjen puna te ndërhyrja në proces, kjo është e pamundur për qeverinë, për pushtetin ekzekutiv, sepse Kushtetua përcakton qartë kufijtë e çdo pushteti dhe kufizimet që ne kemi, pavarësisht se mund të jetë e drejtë ajo që qytetari kërkon.

Fatkeqësisht po shohim se pastrimi i llumit nga sistemi i drejtësisë ka dhe një efekt negativ, sepse shumë prokurorë e gjykatës që janë të zhytur deri në fyt, po e shfrytëzojnë pushtetin që ju jep ligji me moton ‘të kapin, çfarë të kapim’. Ata nuk kuptojnë që ndërtimi i sistemit të ri të drejtësisë kërkon kohë.

Ata që Vettingu i përjashton, do të rikthehen para prokurorëve dhe gjykatëse për të dhënë llogari për pasurinë e tyre, të jenë të sigurt. Edhe ata që bëjnë krime për të përfituar para të zezë, apo shpërblime të majme nga organizata kriminale, drejtësia mbi ta mund të vonojë dhe pak, por nuk do të harrojë.”