Presidenti nuk e njeh, Arta Vorpsi betohet te noteri si anëtare të Gjykatës Kushtetuese

Anëtarja e Gjykatës Kushtetuese, Arta Vorpsi është betuar sot para noteres, pasi e kuptoi se Presidenti i Republikës, Ilir Meta, nuk do ta thërrasë atë për të betim në Presidencë.

Në tekstin e betimit,  gjyqtarja Arta Vorpsi thekson:

“Unë e nënshkruara, Arta Vorpsi, në cilësinë e gjyqtares së Gjykatës Kushtetuese të emëruar, bazuar në vendimin nr.132 datë 21.09.2019 të Këshillit të Emërimeve në Drejtësi, botuar në Fletores Zyrtare, me vullnetin tim dhe gatishmërinë për të ushtruar menjëherë funksionin e gjyqtarit të Kushtetueses dhe me dorën e vendosur mbi Kushtetutë, betohem: Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës së Shqipërisë”

Mësohet se Arta Vorpsi ka kryer betimin tek noterja Miranda Xhemalçe.

Ndryshe, një ditë më parë, Ilir Meta deklaroi se nuk e njeh Arta Vorpsin si anëtare të Gjykatës Kushtetuese.

“Jam shumë i qartë për këtë çështje. Kuvendi është i mirëpritur të komunikojë zyrtarisht me institucionin e Presidentit, dhe jemi të hapur për të bashkëpunuar në respekt të ksuhtetutës dhe detyrimeve kushtetuese dhe kjo është një çështje e mbyllur dhe shumë e qartë”.