Kriminelët në burgje/ Prokurori italian: Mafia shqiptare e lidhur ngushtë me Ndrangheta, ja ç’duhet të bëni…
Mafia shqiptare i ka të ngushta lidhjet me disa nga bandat dhe organizatat e mëdha italiane mafioze, si Ndrangheta, tha sot Prokurori italian i Antimafies, Federico Cafiero De Raho, ndërsa regjimi i posaçëm i burgosjes së personave anëtarë të bandave të krimit të organizuar, tha ai është një mjet i fuqishëm për të ndërprerë lidhjet e këtyre kriminelëve me botën jashtë burgut dhe goditja e krimit të organizuar. Këtë mjet, tha De Raho, Italia e disponon prej vitesh dhe ka rezultuar shumë efikas.
“Me kriminalitetin e Ndranghetës krimi shqiptar ka lidhur marrëveshje punojnë shpesh të dyja palët dhe organizata zhvillohet mbi një territor të tërë evropian, mbi portet e Evropës, organizatat marrin sasi të mëdha kokaine të eksportuara që kthehen në pasuri që shtrihen jo vetëm në Evropë, organizata italiane Ndrangheta e ka shtrirë edhe në Kanada, Amerikë veprimtarinë e saj, ka baza të fuqishme dhe kjo e bën të mundur të jetë shumë e përhapur e të vërë mënjanë një pasuri shumë të madhe.”
Me angazhimin që Italia ka treguar në luftën kundër krimit mafioz në vitet 80-90 por edhe kundër grupeve të tjera kriminale, Italia tha Federico Cafiero De Raho, ka fituar një legjislacion shumë të fuqishëm, aty ku u mendua që të gjendeshin mënyra specifike për luftën ndaj mafies.
“Italia po përpiqet ta përhapë si konfiskimi parandalues që është mjet shumë i duhur për të goditur pasuritë mafioze, ai politikan qe e hartoi legjislacionin u vra nga mafia dhe parlamenti priti deri sa u vra dhe prefekti i Palermos dhe më pas parlamenti miratoi një ligj themelor që përmirësoi mjetet, por duhet të ndodhte edhe ngjarja e rëndë ku u vra gjyqtari Falcone me eskortën e tij që të miratoheshin dispozitat ligjore, që ka të bëjë me regjimin në burg të posaçëm për ata që kanë kryer vepra penale mafioze.”
Drejtësia shqiptare është duke përshkuar një rrugë të ngjashme me atë të Italisë, vlerëson Prokurori italian i Antimafies, Federico Cafiero De Raho,duhet ndaluar mafia që të vazhdojë të qeverisë e të mbajë lidhjet me jashtë.
“Të burgosurit duhet të kenë një ndërprerje totale me të gjithë lidhjet jashtë, të ndërpriten bisedat dhe të ndiqen bisedat moment pas momenti Ky mjet i fuqishëm, burgimi me regjim të posaçëm, do flasim sot edhe në lidhje me menaxhimin e pasurive të sekuestruara që ka rëndësi të madhe për të luftuar mafien”.
