Takim me sindikatat, Albin Kurti: Nga dita e parë, dialog për rritjen e pagës minimale…

Lëvizja Vetëvendosje ka zhvilluar sot një tryezë të përbashkët me përfaqësuesit e sindikatave në Kosovë, ku kryeministri i ardhshëm, Albin Kurti duke kërkuar fuqizimin e sindikatave, me qëllim mbrojtjen e drejtave të punëtorëve paraqiti disa nga vendimet e ardhshme të qeverisë së tij, siç është krijimi i Gjykatës së Punës, kontratën kolektive dhe rritjen inspektorëve të punës.

Albin Kurti tha se qysh në ditët e para në krye të ekzekutivit do të fillojnë dialogun social për të marrë vendimin për rritje të pagës minimale ndërsa renditi disa nga veprimet që do të ndërmarrin si qeveri e ardhshme. Sipas tij, paga minimale do të përcaktohet mbi numrin e orëve dhe do të jetë në harmoni me kontratën kolektive dhe me ligjin e punës.

Përfaqësuesit e sindikatave pjesëmarrës në këtë tryezë, shprehën qëndrimet e tyre për fuqizimin e organizimit sindikal dhe problemet e tyre.

Nga sindikata e KEK-ut, Nexhat Lluminca kritikoi ligjin e ri për paga dhe kontratën për termocentralin Kosova A. E kryetari i sindikatës së Telekomit, Lamih Balaj kërkoi fuqizim të sindikatës dhe bashkim për qëllime të mbrojtjes së punëtorëve.