Krizë humanitare, banorët e Laçit i ankohen Bashës: Nuk kemi marrë asnjë ndihmë!
Banorët e Laçit të prekur nga tërmeti përveçse kanë mbetur pa kulm mbi kokë po vuajnë edhe një situatë të rëndë humanitare. Të revoltuar ata i janë ankuar Kryetarit të Partisë Demokratike, Lulzim Basha, i cili i ka vizituar sot, se nuk kanë marrë asnjë ndihmë.
“Nuk kemi marrë gjë, ngelen duke i ndarë për robt e vet,” shprehet një zonjë e cila ka 5 ditë që kalon nën qiell të hapur dhe pa asnjë ndihmë.
“As çadra nuk na kanë sjellë,” i thotë zotit Basha një banor tjetër i prekur nga tërmeti.
Një nënë me 4 fëmijë thotë se është e detyruar të jetojë në kushte të rënduara me fëmijët e saj dhe se askush nuk ka marrë mundimin të interesohet për të.
“Jetoj te nana me 4 kalamajt. Nuk më është dhënë asnjë ndihmë deri sot. Më është prish shtëpia dhe askush s’ka ardhë. As sot skam marrë asnjë ndihmë,” thotë ajo e dëshpëruar.
Kryetari i Partisë Demokratike, Lulzim Basha u ndal pas mesditës së sotme në Laç, një nga zonat e goditura nga tërmeti, por që nuk ka pasur asnjë zgjidhje nga institucionet. Banorët nuk kanë marrë zgjidhje për strehim, megjithëse banesat e tyre janë të pabanueshme tashmë. Gjithashtu nuk u është ofruar asnjë lloj ndihme tjetër në ushqime dhe rroba, gjë që e bën situatën shumë të rëndë për këto familje.
