Pasi ishte “e kënaqur me 50 viktima”, sot jep dorëheqje kryetarja e Bashkisë Durrës, Valbona Sako

Pas një gafe të rëndë që bëri dje duke deklaruar se “ishte e kënaqur” që kishte vetëm 50 viktima nga tërmeti tragjik që goditi Durrësin dhe Thumanën më 26 Nëntor, sot Kryetarja e Bashkisë Durrës, Valbona Sako ka vendosur të japë dorëheqjen.

“E lënduar nga reagimi i madh negativ ndaj një prononcimi që bëra, nën një stres që i kalon fuqitë e mia, jap dorëheqjen nga detyra e Kryetares së Bashkisë Durrës. Falenderoj nga zemra të gjithë ata që më besuan dhe shpresoj në mirëkuptimin e të gjithëv,” thekson në reagimin e saj përmes rrjetit social Facebook, Valbona Sako.

Ndryshe, dje në një intervistë për TCH, Valbona Sako mes tjerash tha:

“Për hir të së vërtetës duhet ta themi që ky ishte një tërmet i nivelit shkatërrimtar, por që jemi të kënaqur me 50 viktima, sepse në rastet e tjera kanë qenë mbi 1000 viktima”.

Kjo gafë e kryebashkiakes shkaktoi reagime të shumta si ndër qytetarë ashtu edhe nga radhët e politikës, ndonëse mësohet se e para e bashkisë nuk i rezistoi edhe presionit postërmet në Durrës me kërkesat e qytetarëve në nevojë që sa shkon e rritet dhe të vetmin instituion që njohin se i ka tradhtuar është pikërisht Bashkia Durrës.