Njësia 6 Tiranë, Basha: Vlerësim urgjent, strehim dhe ndihma ushqimore…

Pas konstatimit të situatës së rëndë në Njësinë Administrative 6 në Tiranë që u krijua pas tërmetit ku qindra banesa janë shkatërruar, Kryetari i Partisë Demokratike, Lulzim Basha thekson se banorët kërkojnë vlerësim urgjent, strehim dhe ndihma ushqimore sepse deri tani janë tërësisht jashtë vëmendjes dhe të braktisur:

“Sot në njësinë administrative 6 në Tiranë, qindra banesa të shkatërruara dhe të pabanueshme. Mes vuajtjeve, stresit dhe tronditjes banorët kërkojnë vlerësim urgjent, strehim dhe ndihma ushqimore! Ata thonë se deri tani janë tërësisht jashtë vëmendjes dhe të braktisur në fatin e tyre.”

Duke shprehur mirënjohje të gjithë atyre që kanë ndihmuar qytetarët e prekur nga tërmeti, për fat të keq ai këtu informohet se ndihmat nga Kosova për këtë zonë janë ndalur në Kashar:

“Mirënjohje për kontributet dhe ndihmën e disa bizneseve që ndonëse në vështirësi kanë strehuar 40 familje. Ndërkohë u informova se ndihma të tjera të destinuara nga Kosova për këtë zonë janë ndalur në Kashar dhe nuk kanë arritur në destinacion,” thekson Kryetari i Partisë Demokratike, Lulzim Basha, përmes rrjetit social Facebook duke përfunduar:

Gjithsesi vullnetarizmi nuk mjafton. Duhet menjëherë prania dhe ndihma e shtetit!