Borizana, Bubqi dhe Rrënxa e Krujës në mëshirën e fatit, Basha: Do bëjmë gjithçka për t’iu ndihmuar!
Kryetari i Partisë Demokratike, Lulzim Basha, gjatë vizitës së radhës që bëri në fshatrat Borizanë, Bubq dhe Rrënxë të Krujës, konstatoi ashtu si dhe në zonat tjera të goditura nga tërmeti se qindra shtëpi janë dëmtuar dhe mijëra banorë, mes të cilëve fëmijë të mitur dhe të moshuar të sëmurë, vazhdojnë të qëndrojnë jashtë në të ftohtë. Dhe, të vetmit që u kanë ardhur në ndihmë, siç kanë rrëfyer vetë ata janë shtetasit nga Kosova ndërsa shumë prej tyre jetojnë në qese plasmasi, në sera, dikush edhe në çadrën të cilën e morën një javë pas tërmetit.
Një banor me shtëpi të dëmtuar tha se Kryetari i Partisë Demokratike, Lulzim Basha është i pari që i ka vizituar që pas fatkeqësisë që u ka ndodhur një javë më parë.
“Kanë ardhur punonjës të Bashkisë dhe jo specialistë,” thonë banorët ndonëse, sipas tyre, shtëpitë iu dëmtuan që në 21 shtator.
Një kryefamiljar rrëfeu se si në tërmetin e 21 shtatorit, shtëpia e tij u dëmtua. Më pas ai shtoi trarë mbrojtës dhe familja e tij dy muaj më vonë, në tërmetin shkatërrues të 26 nentorit nuk pati dëme në njerëz.
Me këtë rast Lulzim Basha bëri thirrje që inxhinierë të specializuar të vlerësojnë menjëherë gjendjen në Borizanë dhe jo punëtorë të bashkisë, dhe të jepet zgjidhje për familjet.
“Gjëja e parë që duhet është të vlerësohet dëmi dhe të jepet zgjidhje. Në bazë të dëmit të ndahen paratë për rindërtim. Kemi ardhur për të ndihmuar me ç’të mundemi. Do bëjmë gjithçka për t’iu ndihmuar. Do të ngremë zërin që shteti të ndërhyjë”, tha Basha.
Në Bubq dhe Rrënxë të Krujës, ku shtëpitë kryesisht janë të ndërtuara me gurë dhe baltë, sot janë krejtësisht të pabanueshme. Zona përtej varfërisë vuan tani edhe mungesën e një strehe të sigurt.
Pjesë e vizitës së zonave të prekura nga tërmeti nga ana e Kryetarit të Partisë Demokratike, Lulzim Basha, ishte dhe Bubqi ku qëndroi në Qendrën e ndihmave e cila ishte organizuar me Shtab vullnetar për të shërbyer me ushqime, ilaçe, veshje, ngrohje dhe mjek.
“E bëj me gjithë zemër”, theksoi një e re e cila ndihmonte në ndarjen e ushqimeve ndërkohë edhe banorët e kësaj zone konfirmuar se nuk kishte asnjë interesim apo garanci nga shteti se ku do të strehohen gjatë dimrit, duke i lënë në mëshirë të fatit edhe pse ata vazhdojnë të jetojnë në qiell të hapur.
Pas këtyre vizitave Kryetari i Partisë Demokratike, Lulzim Basha, tha se duhet hapa konkretë dhe zgjidhje emergjente sepse gjendja e tyre po rëndohet edhe nga moti i ftohtë:
“Dhjetëra familje me fëmijë të vegjël në Rrëzë të Krujës, kanë mbetur krejt të vetëm në përballimin e pasojave që u la tërmeti i javës së kaluar. Për fat të mirë në këtë fshat nuk pati asnjë viktimë, por pothuajse të gjitha shtëpitë janë të pabanueshme. Asnjë masë nuk është marrë për ta. Asnjë ndihmë, asnjë çadër apo ushqim, nuk u ka ardhur nga shteti,” tha Lulzim Basha duke përsëritur se pa humbur kohë, 150 milionë dollarët që janë ndarë për 10 oligarkë duhet të kalojnë për banorët e dëmtuar nga tërmeti që sot janë në qiell të hapur ndërsa përfundoi:
“Qeveria duhet të nisë lëvrimin e fondeve për tu ardhur në ndihmë banorëve në zonat rurale për të cilët është e pamundur zhvendosja, në mënyrë që të nisin riparimin apo rindërtimin e shtëpive të shkatërruara.”
