Presidenti Trump: Nëse Irani na sulmon, ne do të godasim 52 pika iraniane
Presidenti i Shteteve të Bashkuara, Donald Trump, tha se Washingtoni ka identifikuar 52 pika iraniane që do të sulmojë shumë shpejt dhe shumë fuqishëm nëse Teherani kryen ndonjë sulm ndaj amerikanëve, si shenjë hakmarrje për vrasjen e gjeneralit iranian Qasem Soleimani.
“Irani po flet me shumë guxim për sulmet ndaj disa aseteve të SHBA-së në shenjë hakmarrjeje për shkak se ne vramë liderin e tyre të terrorizmit, i cili sapo kishte vrarë një amerikan dhe plagosi disa të tjerë, për të mos përmendur edhe njerëzit e tjerë që ai kishte vrarë gjatë jetës së tij, përfshirë edhe kohëve të fundit qindra protestues iranianë,” tha Presidenti Trump përmes rrjetit social Twitter.
Qasem Soleimani, që u vra nga një sulm me dron i kryer nga SHBA, teksa po udhëtonte në Irak më 3 janar, tha Presidenti Trump, kishte sulmuar ambasadën amerikane në Bagdad dhe po përgatiste sulme të tjera në lokacione të ndryshme.
“Irani, viteve të fundit ka sjell vetëm probleme. Le të shërbejë si PARALAJMËRIM se sulmet e Iranit ndaj çdo amerikani apo aseteve amerikane, ne kemi 52 lokacione iraniane (që përfaqësojnë 52 amerikanë të marrë peng nga Irani shumë vite më parë), disa në nivel shumë të lartë dhe të rëndësishëm për Iranin dhe kulturën iraniane”, tha Presidenti Trump, duke sqaruar se ndaj këtyre shënjstrave dhe vetë Iranit do të kryhen sulme shumë të shpejta dhe të fuqishme.
Pengjet amerikane për të cilat flet Presidenti Trump, raporton RFE, janë ata të vitit 1979 kur revolucionarët iranianë morën nën kontroll Ambasadën amerikane në Teheran dhe 52 amerikanë u mbajtën peng për 444 ditë.
Ndryshe, në sulmin e 3 janarit 2020, përveç liderit të Forcave elite iraniane Quds, Soleimanit, është vrarë edhe Abu Mahdi aë-Muhandis, zëvendëskomandanti i milicisë në Irak, Hashd Shaabi, milici kjo që mbështetet nga Irani.
Pas këtij sulmi, Gjenerali Gholamali Abuhamzeh tha se Teherani do të ndëshkojë amerikanët kudo që mundet dhe ka sugjeruar se mund të kryejë sulme ndaj anijeve në Gjirin Persik, raporton Agjencia iraniane e lajmeve, Tasnim.
Lideri suprem i Iranit, Ayatollah Ali Khamenei gjithashtu ka kërcënuar se do të ndërmarrë veprime hakmarrëse ndaj “kriminelëve” që kanë vrarë gjeneralin Soleimani, përderisa presidenti iranian, Hassan Rohani deklaroi se vrasja e gjeneralit iranian, do ta bëjë Teherani më të vendosur në rezistencën e tij kundër Shteteve të Bashkuara.
