Vendimi për sipërfaqet për rindërtim, konfuzion për pronësinë e truallit në zonat e prekura nga tërmeti

Një vendim qeverie i ditëve të fundit që rregullon çështjet e pronësisë së trojeve për ndërtesat e reja ka krijuar konfuzion të banorët e zonave të prekura nga tërmeti që kanë banesa private në qytet ose në fshat.

Vendimi i qeverisë thotë se ”në kontratën përkatëse të kalimit të pronësisë për shtëpinë individuale të re sipas kësaj pike, parashikohet dhe heqja dorë e përfituesit nga e drejta e pronësisë në favor të shtetit prej sipërfaqes së truallit të shtëpisë individuale të shembur, e barabartë me truallin e shtëpisë së re individuale”. https://qbz.gov.al/eli/fz/2020/189/6571280f-e696-4be5-a9f6-9b069556a524

Ky paragraf i vendimit i artikuluar më parë nga Kryeministri i vendit ka krijuar konfuzion tek banorët e zonave të prekura. G. P. një qytetar që po jeton ne çadër që nga 26 nëntori 2019 në zonën e Kurbinit tha se, vendimi i qeverisë e ka lënë të pasqaruar çështjen e pronësisë, pasi në këtë formë bëhet shkak për një konflikt të ri social.

I prekuri që deri para tërmetit jetonte në shtëpi private, thotë se ka 300 metra truall, të cilat 92 metra janë ndërtim. Ai nuk është i qartë se  do të kompensohet tërësisht sipërfaqja e truallit apo vetëm e banesës.

Në disa banesa të dëmtuara ka më shumë se një pronar ligjor, ndaj vendimi nuk sqaron se si do të operohet në këto raste. Banorët e prekur pohojnë se kryesisht në fshat një banesë shërben si strehë e dy familjeve të ndara. Në këtë rast vendimi i qeverisë thonë banorët nuk sqaron si, do përfitojnë këto raste dhe si do aplikojnë si për qira dhe për përfitim banese të re.

Banorët që kanë shtëpi private kanë kërkuar që rindërtimi të bëhet në truallin e shtëpisë së dëmtuar. Nëse trualli ku aktualisht janë të vendosura shtëpitë e dëmtuara do të shtetëzohet përdorimi i kësaj sipërfaqeje nga një pronar tjetër behet i vështirë pasi këto troje janë në mesin e tokave te të dëmtuarave.

Procesi i rindërtimit për banorët e prekur nga tërmeti i 26 nëntorit po has në vështirësi dhe vonesa. Përveç pamjaftueshmërisë së fondeve procesi i rindërtimit po vonohet pengohet edhe nga procedurat teknike. Vlerësimi teknik i thelluar ende nuk ka nisur. Pa këtë ekspertizë procesi i rindërtimit të banesave të reja nuk mund të fillojë.

Vendimi i qeverisë i datës 15 janar për cakton se banorët e dëmtuar nëse apartamente përcakton se një familje deri në 2 anëtarë përfiton një strukturë apartamenti 1+1 me sipërfaqe 45-60 m2. Për familje 2-4 anëtarë apartament 2+1 me sipërfaqe 75 deri 80 m2 kurse për familje mbi 5 anëtarë 3+1 me sipërfaqe 90-100 m2.

Ndërsa për shtëpitë individuale  një familje deri në 2 anëtarë përfiton një sipërfaqe60-70 m2. Për familje 2-4 anëtarë apartament 2+1 me sipërfaqe 70 deri 80 m2 kurse për familje mbi 5 anëtarë jo më pak se 90 m2./Monitor/