Tërmeti tragjik në Turqi/ 22 të vdekur, 1030 të plagosur. 400 ekipe vazhdojnë kërkimet…
Të paktën 22 të vdekur dhe 1030 të plagosur. Ky është bilanci i tërmetit të fuqishëm me magnitudë 6.8 të shkallës Rihter që goditi mbrëmë në orën 20:55 (18:55 GMT) Turqinë, ku 400 ekipe të kërkim-shpëtimit mëngjesin e sotëm filluan të nxjerrin edhe trupat e pajetë nga rrënojat.
Autoritetit për Menaxhimin e Fatkeqësive dhe Emergjencave të Turqisë, AFAD, pas tërmetit tragjik në veri të Çüngüş dhe lindje të Elazığ informoi se mëngjesin e sotëm arriti të shpëtoj nga rrënojat 5 persona ndër të cilët edhe një shtatzënë e cila vetëm pas 10 orëve arriti të shpëtoj, raporton Agjencia turke e lajmeve Anadoly.
“Ishte e tmerrshme, godina filloj të shembet, e ne filluam të ikim jashtë,” tha për Agjencinë e lajmeve AFP, Melahat Can, 47 vjeç, banorë i Elazigut duke shtuar se tani ndodhet në një fermë.
Presidenti turk Reçep Tayyip Erdogan tha se do të ndërmarrë të gjitha masat për ta ndihmuar zonën e goditur ku tashmë ndodhen dhe ministrat e duhur.
“Përmes institucioneve tona, AFAD-it dhe Gjysmëhënës së Kuqe, jemi pranë popullit,” tha Erdogan përmes rrjetit social Twitter.
Palestrat sportive, shkollat dhe bibliotekat janë hapur për të strehuar të gjithë ata që kanë mbetur pa kulm mbi kokë ose kanë ikur nga shtëpitë e tyre prej frikës nga lëkundjet e tokës.
Në vitin 1999, 17.000 të vdekur
AFAD raporton se pas tërmetit të fuqishëm kishte rreth 30 pasgoditje të tjera që kanë shqetësuar banorët pranë të cilëve janë më shumë se 400 ekipe të kërkim-shpëtimit.
Ndryshe, Turqia është njëra ndër zonat më sizmike në botë që është dhe arsyeja e lëkundjeve të shumta.
Në vitin 1999 në tërmetin me magnitudë 7.4 të shkallës Rihter që goditi Turqinë mbetën të vdekur më shumë se 17.000 njerëz ndër të cilët qindra në Stamboll. Ekspertët konsiderojnë se në çdo moment ekziston mundësia e lëkundjeve më të fuqishme në Stamboll, në qendër ekonomike më të madhe në vend, me mbi 15 milionë banorë, ku ka godina të shumta janë ndërtuar pa plan dhe pa standarde sizmike.
