Anulimi i projekteve amerikane/ Kaos me deklarata, zëdhënësi i Ambasadorit Grenell për VOA dhe RTK
Shtetet e Bashkuara të Amerikës kanë marrë vendim që t’i anulojnë të gjitha projektet e rëndësishme të investimeve të tyre në Kosovë, derisa Qeveria e Kosovës të marrë vendim për anulimin e taksës kundër mallrave të Serbisë.
Ambasadori i SHBA-së në Berlin, Richard Grenell, i cili është edhe i Dërguar Special i Presidentit Trump për dialogun Kosove-Serbi, mësohet se sot ka pasur një komunikim të ashpër dhe të qartë me Kryeministrin e Kosovës, Albin Kurtin, si dhe Kryetaren e Kuvendit të Kosovës, Vjosa Osmani, të cilëve ua ka bërë të qartë se SHBA-ja është e gatshme të bëjë investime milionëshe në Kosovë, nëse hiqet taksa.
“Megjithëkëtë, SHBA-ja do t’i anulojë të gjitha këto projekte deri sa Qeveria nuk i heq taksat dhe nuk heq dorë nga planet për vendosje të reciprocitetit”, ka thënë ky burim për Televizionin publik të Kosovës, RTK.
Ky lajm shkaktoi gjendje ankthi ndër shqiptarë dhe zgjoi debat të çuditshëm në Kosovë për të ardhë deri tek një deklaratë e Zëdhënësit të Dërguarit Special i Presidentit Trump për dialogun Kosove-Serbi, Ambasadorit të SHBA në Berlin, Richard Grenell, për VOA, i cili thotë se ai kurrë nuk e ka thënë një gjë të tillë.
“Ambasadori Grenell gjithmonë e ka bërë të qartë se tarifat dëmtojnë ekonominë e Kosovës dhe i dërgojnë një mesazh të keq sektorit privat se Kosova nuk është një vend për të bërë biznes. Ai ka dëgjuar nga shumë afaristë brenda Kosovës, përfshirë disa ndërmarrje amerikane, se tarifat po i dëmtojnë ata. Ambasadori Grenell u ka bërë të qartë udhëheqësve politikë në Kosovë dhe Serbi se investimet amerikane në Kosovë nuk do të kenë rezultatin e dëshiruar për të ndihmuar ekonominë nëse tarifat vazhdojnë të jenë në fuqi. Dhe zëvendësimi i tarifave me më shumë barriera duke i quajtur ato “si masa të reciprocitetit ” gjithashtu do të jetë kundërproduktive për krijimin e vendeve të punës për të rinjtë,” citon VOA deklaratën e zëdhënësit Dick Custin.
Por po këtë Zëdhënës të Dërguarit Special i Presidentit Trump për dialogun Kosove-Serbi, Ambasadorit të SHBA në Berlin, Richard Grenell, pra, Dick Custin e citon RTK pas këtij raportimi të VOA, ku thotë se Ambasadori Grenell u ka bërë të qartë liderëve politikë në Kosovë dhe Serbi se investimet amerikane në Kosovë nuk do të kenë përfitimet e dëshiruara nga ndihma në ekonomi, nëse tarifat janë në fuqi.
“Ambasadori Grenell gjithmonë e ka bërë të qartë se tarifat e dëmtojnë ekonominë e Kosovës dhe i dërgojnë komunitetit të sektorit privat një mesazh të keq, se Kosova nuk është një vend në të cilën mund të zhvillohet një biznes,” ka thënë Custin për RTK duke saktësuar madje se Ambasadori Grenell, ka dëgjuar nga shumë pronarë biznesesh brenda Kosovës, përfshirë edhe disa kompani amerikane, të kenë thënë se tarifat po i dëmtojnë ato.
Ndërkohë Ambasadori Grenell e bëri të qartë edhe në një postim në profilin e tij në Twitter, ku thotë se nuk mund të ketë investime amerikane pa heqjen e taksës.
“Taksa duhet të hiqet në mënyrë që të funksionojnë investimet. Është thelbësore!”
Ndryshe, Qeveria e re e Kosovës, ka paralajmëruar zëvendësimin e tarifës me masën e reciprocitetit kundër Serbisë, por ende nuk është sqaruar si do të zbatohet ky vendim.
Zëdhënësi i Grenellit, Dick Custin, ka përsëritur se zëvendësimi i tarifave me më shumë barriera duke i quajtur ‘reciprocitet’ gjithashtu do të jetë kundërproduktive për krijimin e vendeve të punës për të rinjtë.
