Unifikimi i partive shqiptare, Basha: Hap i domosdoshëm në Luginën e Preshevës!
Kryetari i Partisë Demokratike, Lulzim Basha sot në takim me Zv.Kryetarin e Komunës së Preshevës dhe partisë Alternativa, Armend Aliu, si dhe kryetarin e Alternativës për Ndryshim në Bujanoc, Arbër Pajaziti, diskutoj rreth gjendjes së shqiptarëve në Luginën e Preshevës dhe sfidat dhe pritshmëritë e tyre për të nesërmen.
“PD mbështet plotësisht kërkesat legjitime të shqiptarëve të Luginës, duke i konsideruar si çështje prioritare dhe angazhohet për të dhënë kontribut thelbësor në mbrojtjen dhe promovimin e të drejtave të tyre si dhe për zhvillimin ekonomik e social, dhe në fushën e arsimit dhe shëndetësisë,” tha Lulzim Basha ndërsa përgëzoj unifikimin e partive shqiptare:
“Ky është një hap i domosdoshëm për fuqizimin dhe rritjen e përfaqësimit të tyre, dhe që zëri i tyre të forcohet e të jehojë më fort në mbrojtje të të drejtave të bashkëkombasve tanë që jetojnë në Luginën e Preshevës,” tha Kryetari i PD, Lulzim Basha duke bërë të ditur se së shpejti do të vizitoj Luginën e Preshevës.
