Miratohet heqja e taksës pa votat e LDK-së, abstenon Lista Srpska

Qeveria e Kosovës ka miratuar sot me shumicë votash heqjen e taksës për produktet serbe, pa votat e LDK-së dhe me abstenimin e Listës Srpska.

Mbledhja është mbajt në distancë, bazuar në rregullore ndërsa ministrat me email kanë marrë rendin e ditës dhe propozim vendimet.

Anëtarët e kabinetit qeveritar nga radhët e Vetëvendosjes kanë votuar të gjithë për, e po ashtu edhe Emilia Rexhepi, nga komunitetet shumicë jo serbe.

Dy ministrat serbë kanë abstenuar, kurse anëtarët nga LDK-ja nuk kanë kthyer përgjigje. Sipas një burimi në ZKM, për ministrat e LDK-së do të shënohet që nuk kanë marrë pjesë në votim.

Kështu, sipas këtij vendimi, taksa do të hiqet për lëndën e parë, derisa nga 1 prilli pritet të hiqet tërësisht.

Ndërkohë Kryetari i LDK, Isa Mustafa, ka arritur të mbledhë 46 nënshkrime dhe do të dorëzoj pranë Parlamentit të Kosovës kërkesën për mocion mosbesimi ndaj qeverisë së kryeministrit, Albin Kurti.

“Përkundër vendimit të Kryesisë së LDK-së, kryetari Mustafa i ka dhënë një mundësi shtesë Kryeministrit Kurti që të reflektojë sot në heqjen e plotë dhe pa kushte të tarifës si dhe ta kthejë në detyrë ministrin Veliu, me kërkim falje për veprimin e ulët ndaj tij. Por, Kryeministri nuk reflektoi. Prandaj, sot në fund të orarit të punës, LDK ka dorëzuar kërkesën për mocion të mosbesimit me 46 nënshkrime,” ka bërë të ditur LDK përmes një postimi në rrjetin social Facebook.