COVID-19 në Kosovë, Vitia: 91 të infektuar, 5 në gjendje të rëndë
Ministri i Shëndetësisë në detyrë, Arben Vitia, ka bërë të ditur sot se nga 1.037 testime janë konfirmuar 91 raste me COVID-19, 1i vdekur dhe 1 i shëruar. 36 pacientë janë të shtruar në Klinikën Infektive në QKUK, 5 prej të cilëve janë në gjendje më të rëndë shëndetësore.
“Deri më tani janë kryer 1 mijë e 37 testime me mostra të dyshimta. Janë 91 raste të konfirmuara, 1 i vdekur dhe 1 i shëruar. 36 pacientë po trajtohen për COVID-19, 31 prej tyre janë në gjendje stabile, 5 të tjerë janë në gjendje shëndetësore më të rënduar dhe janë në oksigjeno-terapi,” tha ministria Vitia duke kërkuar edhe një herë nga qytetarët që të qëndrojnë nëpër shtëpitë e tyre dhe të respektohet koha e lejuar për qarkullim.
“Përsëri ju bëjmë thirrje për angazhimin tuaj në këtë situatë, ju lutemi që të shmangni edhe vizitat familjare dhe format e tjera të grumbullimit brenda familjeve. Kërkojmë që koha e lejuar për qarkullim të mos kuptohet si një hapësirë për t’u grumbulluar dhe rrezikuar shëndetin publik të qytetarëve të Kosovës, por të respektojmë edhe pikën 3 të vendimit paraprak që mbetet në fuqi sipas të cilit: “Lëvizjet në rrugë të bëhen jo më shumë se dy persona dhe gjithmonë duke mbajtur distancën 2 metra me të tjerët” . Kjo vlen edhe për bizneset si supermarketet dhe subjekte të tjera, të cilat janë të obliguara që t’i marrin të gjitha masat për t’i zbatuar këto vendime.”
Ministria po vazhdon në shtimin e kapaciteteve, tha Vitia, dhe se është bërë kërkesa për furnizim me teste të reja.
“Një pjesë e testeve ka arritur në IKSHP, është iniciuar kërkesa për furnizim edhe me 10 mijë teste të reja. Po vazhdojnë donacionet nga organizata të shteteve mike, po ashtu edhe vullnetarët.”
Ndërkaq, drejtori i IKSHPK-së, Naser Ramadani tha se situata epidemiolgjike është nën kontroll për sa i përket COVID-19 në Kosovë, por qytetarët duhet të vazhdojnë të zbatojnë me përpikëri masat që janë ndërmarrë. Përveç 1.037 mostrave të testuara deri më tash, testimet do të vazhdojnë sipas indikacioneve të përcaktuara në protokollet e hulumtimit epidemiologjik për COVID-19.
“Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke iu obliguar për vetëizolim dhe të kërkojnë ndihmë mjekësore nëse kanë simptome. Deri më sot janë kontaktuar dhe janë nën mbikëqyrje rreth 2000 kontakte të rasteve”, tha Prof.Dr.Naser Ramadani.
Sa u perkët rasteve me COVID në veri të Kosovës, profesor Ramadani tha se testimet bëhen për të gjithë qytetarët e Republikës së Kosovës, të cilët i përmbushin kriteret për testim sipas protokollit dhe se IKSHPK ka informata për dy raste pozitive në veri të Kosovës, të cilat kanë pasur kontakt me një person të konfirmuar si pozitiv në COVID-19 në Serbi, derisa është e drejtë e secilit qytetar që të trajtohet kudo që atij i duket e arsyeshme, tha ai i prerë:
“Institucionet e Kosovës ofrojnë trajtim për secilin qytetar të saj!”
