Të kthyerit nga Kroacia në karantinë. Aktualisht janë…

Në Qendrën e Studentëve janë vendosur në karantinë edhe 65 qytetarë të Kosovës të cilët kanë qenë me punë të përkohshme në Kroaci duke e çuar në 312 numrin e qytetarëe të karantinuar, ka bërë të ditur Drejtori i Qendrës së Studentëve, Fatmir Sfishta.

“Një kontingjent me qytetarë tonë kryesisht nga shteti i Kroacisë që kanë qenë në punë të përkohshme atje kanë ardhur mbrëmë dhe janë vendosur në Qendrën e Studentëve përkatësisht në konviktin numër 6. Numri i tyre ka qenë 65. Deri në orët e vona pasmesnatës ne kemi arritur që t’i vendosim nëpër dhomat e tyre ashtu siç i kemi rekomandimet edhe nga mjekët. Për momentin i kemi 312 veta. Mbi 900 persona janë trajtuar prej fillimit këtu. Shumica e tyre vetëm kanë dalë sepse kanë rezultuar negativ gjatë testimit për virus,” tha Fatmir Sfishta për EO duke folur për një punë të re dhe të vështirë me të cilën u përballë stafi i Qendrës Studenti.

“Kjo është një punë e re që neve është dashur domosdo ta mësojmë, pa dëshirën tonë, por ne kemi qenë më të përafërt që kemi mundur ta mësojmë këtë punë sepse kemi punuar me studentë. Këta duan trajtim më ndryshe, ka ndërruar gjendja, është kohë epidemie. Punë e vështirë por ditë për ditë po mësojmë gjëra të reja. Kjo është në funksion të atyre njerëzve që të kalojnë sa më lehtë këto ditë të karantinimit.”

Drejtori i Qendrës së Studentëve, Fatmir Sfishta, tha se prej shndërrimit në karantinë aty janë trajtuar mbi 900 qytetarë të cilët para pandemisë kanë rastisur të jenë jashtë Kosovës; Prej tyre vetëm 6 kanë dalë pozitiv me COVID-19.