Demokracia vdiq, rroftë demokracia!
nga Agim Popoci
Sot, zyrtarisht, demokracia vdiq në Shqipëri!
Kryeministri Edi Rama shembi kalanë e fundit të demokracisë e cila u ruajt me fanatizëm nga artistët dh ejo vetëm, por nuk ndërgjegjësoi as për dy vjet njeriun që njeh dhunën e kazmën, por, jo dhe qytetarin.
Pas këtij akti barbar, ata që nuk e mbrojtën Teatrin kërkojnë kryengritje, ata që e sollën Edi Ramën në pushtet bëjnë thirrje për luftë, dhe nuk harrojnë ti kërkojnë llogari liderit të opozitës!
Ky lëmsh që krijoi Edi Rama së bashku me Ilir Metën dhe Serbinë që e solli në pushtet, me infiltrimin e të kuqve në të gjitha poret e së djathtës shqiptare dhe mediave kryesore, po krijon tendencën e nevojës për një revolucion, si e vetmja rrugë për largimin e Ramës nga pushteti!
Pa pyetur se ku ishin këta revolucionar kur Edi Rama vendosi traun në Rrugën e Kombit, pa u djersitur për të konstatuar se ku ishin këta revolucionar kur, Rama dhe vetëm Rama, la vendin pa Gjykatë Kushtetuese, pa e lodhur trurin se ku ishin këta trima kur Lali Eri me urdhër nga Rama e shndërroi Unazën e Re në gërmadhë, shqiptarët në këtë ditë morti duhet të jenë të kujdesshëm si kurrë më parë, sepse revolucioni i armatosur gjithmonë i solli këtij vendi ardhjen e komunistëve në pushtet, krim dhe gjakderdhje!
Ku janë ata, a nuk janë në pushtet! Shumë prej qytetarëve do ta bëjnë këtë pyetje! Po, janë dhe do të vijnë në mënyrë revolucionare sepse kemi luftën brenda llojit, dhe janë të gatshëm të vrasin për pushtet.
Por sot ka vdekur demokracia dhe vetëm ajo duhet të ringjallet. Telalli francez duke shpallur vdekjen e mbretit, “Le roi est mort, nivel le roi!”, njëkohësisht shpallë dhe ardhjen e mbretit të ri në fron, ashtu siç i duhet demokracisë shqiptare, vendosja e rendit të ri demokratik!
Për t’u realziuar kjo, shqiptarët nuk duhet të harrojnë se asgjë e rastësishme nuk ndodhi në vitet 1924, 1945, 1997 dhe në vitin 2013, ku pësoi vetëm Shqipëria, ndonëse u proklamuan fitore të mëdha.
Ashtu dhe sot, shqiptarët duhet të bëhen bashkë duke kërkuar rikthimin e rendit kushtetues jo me llumin komunist me në krye Ilir Metën dhe këlyshët e tij, por me vendosmëri ti dëshmojnë regjimit të Ramës dhe faktorit ndërkombëtar se epoka e Edi Ramës ka perënduar!
Duke u kujdesur që të mos humbet asnjë jetë qoftë edhe e atij fadromisti që i ra për hise të zbatoj urdhrin e Lali Erit, shqiptarët duhet mësojnë nga pësimet e mëdha në Rrugën e Kombit, Gjykata Kushtetuese, Unaza e Madhe dhe tashmë Teatri Kombëtar, dhe në mënyrë demokratike ti bëjnë të qarta kërkesat e tyre duke mos u zbrapsur deri në largimin e Edi Ramës!
Sepse, shqiptarët me mosveprimin e tyre i lejuan Edi Ramës ta vras demokracinë!
Dhe, shqiptarët tashmë me veprimin e tyre duhet ta ringjallin atë me zhbërjen e vendimeve kriminale të Edi Ramës dhe rikthimin e vijimësisë së zhvillimit të shtetit shqiptar, për të thirrur në fund, me mburrje:
Rroftë demokracia!
