Samiti i G7 do të zhvillohet në Shtëpinë e Bardhë

Samiti i liderëve të shtatë shteteve më të industrializuara në botë, G-7, do të zhvillohet në fund të muajit qershor në Shtëpinë e Bardhë, në Washington, pavarësisht situatës së krijuar me koronavirus, tha zëdhënësja e Shtëpisë së Bardhë, Kayleigh McEnany.

McEnany tha sot në një konferencë për media se presidenti amerikan, Donald Trump e konsideron Samitin si shembull të hapjes graduale të ekonomisë së Shteteve të Bashkuara.

“Ne do të mbrojmë liderët botërorë që vijnë këtu, ashtu si mbrojmë njerëzit në Shtëpinë e Bardhë,” tha zëdhënësja e Shtëpisë së Bardhë, Kayleigh McEnany.

Dy pjesëtarë të stafit të Shtëpisë së Bardhë kanë dalë pozitivë në testet për koronavirus. Një prej tyre është rikthyer sot në punë.

Ndryshe, Shtetet e Bashkuara janë prekur më së keqi në botë nga koronavirusi. Ato kanë regjistruar mbi 1.6 milion të prekur dhe mbi 98.000 të vdekur nga ky virus./RFE/