Kufiri shqiptaro-shqiptar, pas radhëve kilometrike, pezullohet taksa për dezinfektimin e mauneve

Pas radhëve kilometrike që u krijuan në Morinë dhe paknaqësisë së krijuar nga kompanitë që po lëviznin nga Shqipëria në drejtim të Kosovës për shkak të taksës së vendosur prej 22 eurove për dezinfektimin e mauneve, ka reaguar Ministria e Brendshme e Kosovës duke pezulluar vendimin:

“Pezullohet kontrata për dezinfektimin e mauneve që vijnë në Republikën e Kosovës. Nga ky moment importuesit nuk kanë nevojë t’i dezinfektojnë maunet në pikat kufitare,” thekson Ministria e Brendshme duke sqaruar se dezinfektimi i kamionëve parashikohej në kuadër të masave për luftimin e pandemisë së COVID-19.

Ndërkohë problem vazhdon të jetë vendimi i autoriteteve kosovare që të gjithë personat që hyjnë në territorin e Republikës së Kosovës duhet të kenë dokumentin i cili konfirmon rezultatet negative për testin e koronavirusit jo më të vjetra se katër ditë, dhe ata që nuk posedojnë testin, duhet të vetizolohen për shtatë ditë.