Video/ Pendarovski: Zgjidhja e problemit Kosovë-Serbi do të ketë efekt në rajon!

Sido që të zgjidhet problemi i Kosovës, të gjithë vendet e rajonit do t’i ndjejnë efektet qoftë pozitive apo negative, tha Presidenti i Maqedonisë, Stevo Pendarovski,

“Unë s’po them që ndryshimi i kufijve nuk mund të jetë një zgjidhje për problemin e Kosovës, por një zgjidhje e tillë nuk duhet të dërgoj drejt një efekti domino në rajon dhe nuk duhet të prek dhe shkel kufijtë tonë,” tha Pendarovski në një intervistë për RFE duke shtuar se Maqedonia e Veriut në vazhdimësi është duke kërkuar garanci ndërkombëtare nëse një ide e tillë është në tavolinë dhe nëse pranohet nga Prishtina dhe Beogradi.

Ai shpreson në një zgjidhje të shpejtë, meqë sipas tij problemi Kosovë-Serbi po e mban rajonin të bllokuar dhe të pa zhvilluar.

“Shpresoj në një zgjidhej të shpejtë për këtë çështje. Sinqerisht dua, sepse ky problem, përveç tjerash po e mban rajonin të gozhduar.”

Pendarovski vlerëson se është shumë e rëndësishme që të mos mbetet konflikt i ngrirë mes dy shteteve, por të zgjidhet në mënyrë që i gjithë rajoni të lëviz përpara drejt BE’së.

Ndërkohë duke folur rreth afateve kohore për zgjidhjen e problemit mes Prishtinës dhe Beogradit, Pendarovski ka shprehur rezervat e veta, meqë tashmë SHBA po futet në periudhën parazgjedhore.

“Ne jemi praktikisht disa muaj larg zgjedhjeve amerikane dhe BE gjithmonë ka ndjekur udhëheqjen e SHBA, por në këtë moment unë nuk shoh ndonjë sinkronizim midis BE dhe administratës në Washington.”