OBSH do të hulumtojë origjinën e koronavirusit në Kinë

Organizata Botërore e Shëndetësisë, OBSH, tha se do të formojë një ekip ekspertësh ndërkombëtarë, të cilët do të shkojnë në Kinë për të studiuar origjinën e koronavirusit.

Një ekip i OBSH-së ka qëndruar në Kinë për të përgatitur vizitën e ekipit më të gjerë të ekspertëve.

Shefi i programit të urgjencave në OBSH, Mike Ryan, tha se ekipi ishte shumë i kënaqur me bashkëpunimin e zyrtarëve kinezë deri më tani, por shkuarja dhe vendosja e një ekipi më të madh, do të kërkonte kohë.

Kina është kritikuar për mënyrën sesi e ka menaxhuar situatën me pandeminë, raporton RFE, që nga paraqitja e rasteve të para të raportuara me koronavirusin e ri, që e shkakton sëmundjen COVID-19.

Më së shumti kritika në drejtim të Kinës kanë bërë Shtetet e Bashkuara.

Ndryshe, presidenti amerikan, Donald Trump ka akuzuar OBSH-në për bashkëpunim me Kinën në fshehjen e informacioneve për pandeminë. Mu për këtë, ai vendosi për tërheqjen e SHBA-së nga anëtarësia në Organizatën Botërore të Shëndetësisë. OBSH i ka hedhur poshtë akuzat.

Sipas të dhënave të Universitetit Johns Hopkins, koronavirusi në gjithë botën ka prekur mbi 13.8 milionë njerëz. Prej tyre, gati 590.000 kanë vdekur dhe mbi 7.7 milionë janë shëruar.