Pamela Qirko, zgjidhet Kryetare e KPK

Pamela Qirko zgjidhet kryetare e Komisionit të Pavarur të Kualifikimit.

Pas votimit të fshehtë, që u zhvillua në prani edhe të vëzhguesve ndërkombëtarë të Operacionit Ndërkombëtar të Monitorimit, rezultoi e zgjedhur me 7 vota pro, kandidatja Pamela Qirko.

Ushtrimin e detyrës së Kryetarit të Komisionit të Pavarur të Kualifikimit, Pamela Qirko do ta fillojë prej sot 21 korrik duke pasuar Komisioneren Genta Tafa (Bungo).

Ndryshe, Pamela Qirko është diplomuar në vitin 2001 në Fakultetin e Drejtësisë, Universiteti i Tiranës. Znj. Qirko në vitin 2003 është certifikuar nga ISAAT për “Konsulencë ligjore të shoqërive tregtare”. Në vitin 2004 ka fituar licencën e avokatit nga Dhoma e Avokatisë Tiranë, me të drejtë përfaqësimi në të gjitha shkallët e Gjyqësorit.

Ajo e ka nisur karrierën e saj profesionale si juriste  në vitin 2001 pranë  kompanisë  “AMC” sh.a. (sot Telekom Albania, pjesë e “Deutsche Telekom Group”), për të qëndruar në këtë detyrë deri në vitin 2007.

Pas kësaj ekperience profesionale,  ajo u promovua dhe mori emërimin si “Juriste e lartë”, post ky që e mbajti deri në qershor të 2017-s, duke kontribuar në zhvillimin e mëtejshëm dhe në suksesin e kësaj shoqërie.

Juristja Qirko ka kryer disa specializime jashtë vendit në fusha të ndryshme të drejtësisë dhe menaxhimit nga institucione të ndryshme europiane, si: Akademia e Ligjit Europian (ERA) në Trier, Gjermani; Gjykata Europiane e Drejtësisë (CJEU) në Luksemburg, BIT Consultants në Varshavë, Poloni, si dhe Universitetin e Sheffield-it në Selanik, Greqi.

Në qershor të vitit 2017, Pamela Qirko u emërua nga Parlamenti i Shqipërisë si  Komisionere në Komisionin e Pavarur të Kualifikimit.