“Dashuria e Ramës për listat e hapura”, Bylykbashi: Gjiknuri refuzoi të fliste për propozimin tonë!

Pas deklaratës së Kryeministrit Edi Rama për propozimin e Opozitës së Bashkuara për hapjen e listave 100% dhe mosndryshimin e formulës për koalicionet dhe përllogaritjen e mandatevehapjen e listave dhe koalicioneve nuk mund të kishte tjetër epilog të Këshillit Politik. Përfaqësuesi i PD, Oerd Bylykbashi, tha pas mbledhjes së Këshillit Politik se mazhoranca ka refuzuar të diskutojë për propozimin e Opozitës së Bashkuar ndërsa shtoi se dashurinë e fundit për lista e hapura Edi Rama e ka vetëm një alibi për të hequr koalicionet zgjedhore.

“Sot, Opozita e Bashkuar bëri prezent në Këshillin Politik, ashtu siç ne kishim kërkuar dhe premtuar, qendrimin e saj të qartë në lidhje me një çështje themelore për reformën zgjedhore dhe për zgjedhjet, debatin në lidhje me ndryshimet për sistemin zgjedhor.

Qëndrimi i saj është shumë i qartë: nëse do të shkohet drejt hapjes së listave, listat duhet të hapen 100%, jo pjesërisht, me kusht që formula aktuale kushtetuese dhe ligjore e koalicioneve dhe formula për ndarjen e mandateve brenda koalicionit, të mos ndryshojë,” tha Bylykbashi duke shtuar:

“Ajo që është fare e qartë për shqiptarët dhe për partnerët ndërkombëtarë është që Edi Rama, dashurinë e tij të fundit për listat e hapura e ka vetëm një alibi për të hequr koalicionet zgjedhore, për t’u bërë të pamundur shqiptarëve që, ndërkohë që u hapet lista dhe votojnë në mënyrë të veçantë kandidatët, e mbyll listën e partive, që zgjedhësit shqiptarë të mos e japin votën individuale për parti të veçanta. Pra, është një farsë, është një justifikim për Edi Ramën hapja e listave në funksion të këtij qëllimi, që të ndryshojë rregullat e garës së kundërshtarëve të tij politikë. Ne e bëmë shumë të qartë këtë qendrim.

Kërkuam pozicionimin politik të përfaqësuesve të maxhorancës që të shprehen, nëse është dakord me hapjen 100% të listave me kushtin që të mos ndryshojë formula e koalicionit dhe formula e shpërrndarjes së mandateve. Përfaqësuesi i maxhorancës, përgjatë gjithë mbedhjes së Keshillit Politik, refuzoi në mënyrë të vazhdueshme që ta bënte këtë, edhe pse i dhamë modelet se ku ekziston në Europë modeli i koalicionit që Shqipëria e ka tashmë prej 17 vitesh, është një traditë e konsoloduar kushtetuese dhe ligjore.

Këto vende janë Belgjika, Hollanda, Danimarka, Letonia, janë një seri shtetesh, po të vazhdojmë, Italia, ky model është marrë fillimisht nga Italia, edhe në Greqi është aplikuar. Këto janë modele të vendeve nga është marrë dhe e përdorim ne prej 17 vitesh.

Nëse maxhorancës nuk i duket model diçka që ka funksionuar pa asnjë problem për 17 vite dhe ia ka bërë të qartë shqiptarëve forcën e çdo partie të veçantë, atë që ne po përpiqemi me lista të hapura të bëjmë të qartë – fuqinë zgjedhore që ka çdo kandidat, i cili merr mandat për të shkuar në parlament, – është e qartë se e gjithë kjo përpjeke e Edi Ramës është për të vrarë mundësinë e partive politike për të garuar ashtu si ato vendosin, me të drejtën e tyre kushtetuese për t’u bashkuar e për të garuar në liri të plotë.”

Me këtë rast Përfaqësuesi i PD në Këshillin Politik, Oerd Bylykbashi, tha se presin refketim nga mazhoranca.

“Kjo është një çështje, ashtu siç thanë edhe partnerët ndërkombëtarë, është çështje e Këshillit Politik, duhet trajtuar në Këshillin Politik, me konsensus, gjithëpërfshirje dhe transparencë dhe sa kohë kjo nuk cënon marrëveshjen e 5 qershorit.

Gatishmëria jonë është e plotë, ne erdhëm me propozim, kështu që çdo lloj përpjekje e maxhorancës e në veçanti e Edi Ramës, për të turbulluar, është e kotë në sytë e shqiptarëve.”

Thirrje opozitës, Gjiknuri: Sillni një model, hapja e listave ka sfida!

Përfaqësuesi i mazhorancës në Këshillin Politik, Damian Gjiknuri, nodnëse e kishte kundërshtuar propozimin e Opozitës së Bashkuara brenda në mbledhje, jashtë saj dhe para kamerave e përshëndeti duke shtuar se kjo është një procedurë që ka sfida.

“Një gjë është për t’u përshëndetur, që risitë kushtetuese që po diskutohen në Kuvend, janë gjetur me vend dhe nga opozita jashtëpalamentare. Në dokumentin e tyre politik të sjellë sot, ata mbështesin hapjen e listave të kandidatëve. Amendimet kushtuese s’e pengojnë atë që kërkon opozita e bashkuar, e cila mundëson hapjen e listave dhe ia delegon kodit për ta rregulluar. PD dhe opozita, u kthye në tavolinën e negociatave, duke humbur kohë. Kanë një muaj që diskutonin diçka që po e përshëndesin sot. Koha nuk mund të ndalojë sa herë PD-se t’i kthehet mendja. Por ndryshimet i shkojnë Kodit. Mundësohet hapja e listave dhe çështja e koalicionit, le të zgjedhin modelet aktuale perëndimore për hapjen e listave dhe koalicionet. Kodi zgjedhor i ka mundësitë, dhe ne bashkë me opozitën, jemi të gatshëm që të detajojmë rregullat. Hapja e listave ka sfida të mëdha administrative. Ndaj duhet kujdes në mënyrën se si formohen koalicionet. Iu thamë që të gjejnë modelet të vendeve me lista të hapura dhe që kanë koalicione të tilla zgjedhore. Por deri tani nuk kemi gjetur. Rëndësi e madhe është hapja e listave. Dhe unë kam pasur skeptizicmin tim, s’e mohoj. Hapja e listave është kërkesë e gjithëpranuar,” tha Gjiknuri dhe ashtu si shefi i tij u shpreh se pas miratimit të ndryshimeve kushtetuese mund të ketë diskutime.

“Momenti që miratojmë ndryshimet kushtetuese hajde të ulemi t’i zbërthejmë. Ndaj është kodi zgjedhor që të adresojmë të gjitha shqetësimet. Gjithçka është e mundur dhe në draft është jo më pak se 2/3, do të thotë që i është dhënë ligjvënësit të përcaktojë modalitetet.

Iniciativa erdhi nga opozita parlamentare. Për shkak të problemeve që u krijuan për miratimin e marrëveshjes së 5 qershorit dhe zhgënjimit që patën qytetarët shqiptarë që nuk u adresuan të gjitha shqetësimet, kërkesa ka qenë hapja e listave. Ka sfida hapja e listave dhe për këtë duhet të punojmë. Kjo sfidë duhet të realizohet në kodin zgjedhor. PD dhe në marrëveshjen e 5 qershorit realizoi të gjitha kërkesat e saj.”