Vetëvendosje, mocion mosbesimi për Qeverinë Hoti

Lëvizja Vetëvendosje po bëhet gati për ta çuar Qeverinë Hoti në shtëpi. Shefi i Grupit Parlamentar të kësaj partie Rexhep Selimi tha se prej sot ka nisur mbledhjen e firmave për mocionin e mosbesimit ndaj Qeverisë Hoti.

Qeverisja ilegale, katastrofa humanitare dhe kapja e shtetit, tha ai sot janë arsye të mjaftueshme që të mbështetet mocioni nga secili deputet edhe nga parti të tjera. Dhe, në këtë mënyrë i hapet rrugë mbajtjeve të zgjedhjeve të reja.

Edhe nënkryetarja e Parlamentit të Kosovës, Arbërie Nagavci, raporton Kosovapress, tha se Qeveria Hoti e ka kolapsuar tërësisht sistemin shëndetësor edhe ashtu të brishtë.

“Përveç kolapsit në shëndetësi, kjo qeveri ende nuk ka plan konkret për rimëkëmbje ekonomike. Kjo qeveri po e çon vendin drejt një katastrofe humanitare,” tha Nagavci duke folur edhe për dështimin në ndërmarrjet publike, siç tha po rikthehet kapja e tyre nga partitë në pushtet.

Bordet e pavarura të cilat po shkarkohen nga Qeveria Hoti, tha Arbërie Nagavci, gjithashtu janë veprime të papërgjegjshme ndërsa përfundoi:

“Qeveria nuk ka platformë për dialogun me Serbinë. Kosovës i nevojitet një qeverisje në interes të qytetarëve.”