Talat Xhaferi rizgjidhet kryetar i Parlamentit të Maqedonisë së Veriut
Parlamenti i Maqedonisë së Veriut me 62 vota për, ka rizgjedhur Talat Xhaferin për kryetar të institucionit ligjvënës, me propozim të partive të shumicës parlamentare, LSDM dhe BDI. Sipas tyre Xhaferi gjatë mandatit të deritashëm ka dëshmuar se me sukses mund ta drejtojë këtë institucion, andaj edhe i kanë dhënë mbështetjen e tyre.
“Talat Xhaferi është njeriu i duhur në vend të duhur. Ai është kryetari më i suksesshëm i kuvendit, njeriu që i ka thyer tabutë se shqiptari jo vetëm që mund të jetë kryetar kuvendi, por edhe kryetar më i suksesshëm”, ka deklaruar Izet Mexhiti në emër të grupit parlamentar të BDI-së.
Edhe Lidhja Social Demokrate i ka dhënë mbështetje rizgjedhjes së Talat Xhaferi në postin e kryetarit të kuvendit, por njëri nga nënkryetarët e LSDM-së, Muhamed Zeqiri, raporton RFE, ka drejtuar kritika ndaj Xhaferit duke e akuzuar për lidhje me ish-strukturat e qeverisë së Nikolla Gruevskit, në veçanti me ish-kryetarin e kuvendit, Trajko Veljanovski.
“Është kryetari më i suksesshëm që do të mbahet mend si kryetari i vetëm që ka amnistuar një kriminel si Trajko Veljanovski,” tha Zeqiri. Ndryshe, Trajko Veljanovski ishte Kryetar i Parlamentit gjatë trazirave më 27 prill 2017.
