Kardhiq-Delvinë, ARRSH hap garën për rishikimin e projektit

Me fonde të buxhetit të shtetit për vitin 2020 janë planifikuar shpenzimet për projekt-studimet e sinjalistikës në 6 lote të rrugës Kardhiq-Delvinë; të rrugës lidhëse Shijan –Ura e Gajdarit, rehabilitimi i segmentit Shijan –Delvinë; dhe projektit për mbrojtjen dhe rivitalizimin e skarpateve.

Autoriteti Rrugor Shqiptar hapi garën për tenderin me vlerë 30,7 milionë lekë për hartimin e këtyre projekteve.

Për sinjalistikën që pritet të zbatohet në 6 lotet e aksit Kardhiq-Delvinë, aktualisht pranë ARRSH-së është një projekt i hartuar në vitin 2009, që do të rishikohet me përfshirjen e elementëve të rinj për rritjen e sigurisë rrugore.

Për lotin 7 të tunelit, puna është në fazën e hartimit të projektit, ku do të përfshihet edhe sinjalistika që do të zbatohet.

“Detyra e kontraktorit është rishikimi i projektit të sinjalistikës të hartuar në vitin 2009, adoptimi i  tij  me  standardet  e  reja  të  sigurisë, hartimi i një projekti  të  detajuar të  zbatimit  i  cili  do  të përfshijë të gjitha masat për sinjalistikën dhe sigurinë  rrugore në këtë aks, në zbatim të Kodit Rrugor, Rregullores në zbatim të këtij kodi, Manualit të Sinjalistikës dhe standardeve shqiptare apo ndërkombëtare, si dhe eksperiencave më të mira të vendit tonë në këtë drejtim”, përcaktohet nga ARRSH në termat e referencës të tenderit.

Në projekt studimet do të përfshihet edhe realizimi i ndriçimit për kryqëzimin e  Shijanit, ku sipas Autoritet Rrugor Shqiptar konsiderohet, si nyje  shumë e  rëndësishme, pasi trafiku është i lartë dhe në kushte të errësirës mund të ketë probleme me shikueshmërinë.

Ndërsa për  rivitalizimin e skarpatave  për lotët 1 dhe 6, duke marrë parasysh  edhe analizat laboratorike të kryera rekomandohet që fokusi i studim projektit të konsulencës të jetë në  vendosjen e rrjetave prej teli, si dhe ngritjen e sistemit të drenazhimi të ujerave sipërfaqësore.

Rruga Kardhiq –Delvinë ka një gjatësi 33 km dhe shtrihet në jug të Shqipërisë dhe përshkon rrethin e Gjirokastrës, Delvinës dhe Sarandës. Në këtë aks janë përfunduar rreth 16 km rrugë dhe 16 km të tjerë janë në fazën e zbatimit të punimeve. Pjesa e mbetur prej 16 km ndahet në lotet 4, 5, 6, 7 dhe 8, nga të cilat loti 7 janë tuneli dhe loti 8 sinjalistika e përgjithshme për 32 km./Monitor/