Presidenti nuk shpërndau Parlamentin, dekretoi datën e zgjedhjeve: 25 Prill 2021!

Presidenti i Republikës, Ilir Meta, përkundër premtimit të madh kombëtar sot ka dekretuar datën e Zgjedhjeve Parlamentare që pritet të zhvillohen në vitin 2021.

Me Dekretin e Presidentit përfundojnë hamendësimet mbi jetëgjatësinë e kësaj qeverie të dështuar, kërkesat e opozitës dhe shpërndarjen e Parlamentit ashtu siç premtoi Presidenti më 2 Mars, dhe tashmë u mbetet shqiptarëve që ti lënë ëndërrat me LSI sh.a. dhe ta zgjidhin këtë çështje me votën e tyre më 25 Prill 2021.

Ndryshe, ky vendim i Presidentit vjen pas konsultimeve me krerët e partive politike të zhvilluara më 4 shtator në Presidencë. Për opozitën data 18 prill ishte data më e përshtatshme për mbajtjen e zgjedhjeve parlamentare ndërsa mazhoranca la të hapur çdo datë që do të përcaktojë Presidenti i Republikës, me përjashtim të 2 majit e cila përkon me festën e Pashkëve Ortodokse.

DEKRET

PËR CAKTIMIN E DATËS SË ZGJEDHJEVE PËR KUVENDIN

Në mbështetje të nenit 65, pikat 1 dhe 2, 92 shkronja “gj” dhe 93 të Kushtetutës së Republikës së Shqipërisë, si dhe të nenit 8, 9, pikat 1 dhe 4 të ligjit nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar, si dhe pas konsultimit me partitë politike mbi caktimin e datës së zgjedhjeve për Kuvendin e Shqipërisë,

Dekretoj:

Neni 1

Zgjedhjet për Kuvendin të zhvillohen ditën e diel, më datë 25 prill 2021.

Neni 2

Ky dekret hyn në fuqi menjëherë.

Nr. Dekreti 11700
Tiranë, më 06.09.2020

PRESIDENTI I REPUBLIKES
ILIR META